All Chin Society Yangon Riantuantu Nih Hakha Khirhfabu kip Pastor Le Khuanu Khuapa Tonnak An Ngei

All Chin Society

Salai CungCung| 2019 October 17| All Chin Society Yangon riantuantu hna nih an riantuan ning chimfelnak le bawmhhalnak kong he pehtlaih in October 17 zing sml 7:30  HBA  Hall ah Hakha Khirhfabu kip Pastor le Hakha khuanu khuapa he  tonpumhnak an ngei hna tiah kan theih.

“Chin ramkulh cozah hi an zung ah voihnih kan rak leng cang hna. A tu cu cozah lei si ti loin mipi hi a voikhatnak tonnak kan rak ngei hna hi a si. A tu Hakha dih in Falam lei ah kan kal than lai, Falam dih in Kanpetlet,Mindat, Matupi,Thanlang, Tonzaang tibantuk in Chin ramkulh peng kip ah kan kal lai. October 19 ah khin Kalay ah um Chinmi zapi sin ah kan kal lai. Tu lio All Chin Society nih sak kan timh mi inn hi a zapi Sing thongthum dih ding a si i cheuthum ah cheukhat cu kan hmuh cang, a tu hi a tang mi cheuhnih hi kawl than rih ding kan si caah tubantuk in kan rian tuan ning mipi sin theih ternak rak tuah pah in le  kan herh mi tangka pawl bawmh rak hal pah in kan rak hi a si” tiah All Chin Society Yangon Chairman nih The Chinland Post ah a chim.

“Hi inn kan sak mi cu Chinmi zapi caah a si. Cu caah kan Chinmi zapi dam lo ruang le harsa ruang ah Yangon lei a rak phan mi hna caah a lak tein um khawhnak caah tiin kan sak mi a si. Cun Chin ramkulh chung in kan minster pawl ca zong ah a dang tein room zong kan tuah piak hna. Ramdang lei in a rak tlung mi siseh Lai tlang lei in a rak tlung mi seh umnak ding le riah khawhnak caah sak mi a si. A tu December thla ah cun dih khawh ding in kan i zuam lai” tiah a chim chap.

Hi tonpumhnak ah All Chin Society Yangon riantuantu lei nih an riantuan ning kong chimfelnak an ngeih dih hnu ah an i timh mi pawl theih ternak zong an tuah chih. All Chin Society nih Yangon ah Chinmi zapi harsa mi le tlungkalnak a ngei lomi caah tiin sak mi bawmh hal  cu Hakha khuanu khuapa le Pastor te nih an co hlan piak hna. Hakha khuanu khuapa nih Sing 100 le Hakha Khirhfabu kip Pastor lei Sing 300 in tuanvo an pek hna tiah kan theih.+++

 

Leave a Commnet

%d bloggers like this: