American Nih UN Ah Chawva Hnarcheu Uak Pek Ti Lo Ding In Bia A Khiah

Chinland Post| 2018 January 18| Palestine bawmhnak pekmi UN (United Nation) bawmhnak program ah American nih bawmhnak a pek tawnmi UN chawva cu hnarcheu nak tamdeuh pek ti lo ding in biakhiahnak a tuah cang.

Palestine bawmhnak caah American nih UN ah a pek tawnmi dollar nuai 125 chung in hnarcheu uak dollar nuai 65 cu ka pe ti lai lo, ka phih chung rih lai. Dollar nuai 60 lawng ka pek cang lai tiah American nawlngeitu hna nih fehternak bia an chim.

UNRWA tiah auhmi UN bawmhchanhnak cu American nih a pek tawnmi chawva a si. American nih UNRWA riantuannak caah zatuak 30% a pek i nikum ah khan a pekmi zapi hi dollar nuai 370 a si.

Chawva a pekmi hnarcheu uak pek ti lo ding in American nih atu bantuk in biakhiahnak a tuahmi ruang ah bawmhchanh a herhmi minung sing tampi a hnorsuan hna lai tiah UN lutlai hna nih ralrin peknak bia an chim.

Israel he remdaihnak hmuh ding kan i zuamnak Palestine leikap nih an al ahcun American nih bawmhnak ka phih lai tiah President Donald Trump nih tuandeuh ah a rak chim bal cang.

Nichuah laifang remdaihnak he pehtlai in President Donald Trump timhtuahnak hi kan cohlang kho lo tiah Palestine President Mahmoud Abbas nih kan hnuzarh Sunday ni ah khan a chim ve. Donald Trump i remdaihnak hi kan hmai a kan bengh bantuk in kumzabu chung ah a chiabikmi lamthluan a si tiah Palestine hruaitu hna he tonbiaruahnak ah President Mahmoud Abbas nihcun a chim.

A biapimi cu Jerusalem hi Israel khualipi ah Trump nih cohlannak le fehternak a tuahmi cung ah Palestine nih fakpi in an dohkalh.

UN caah chawva a pek tawnmi a phihkharnak a ruang hi dantatnak caah tuahmi a si lo. Tuanvo ngeitu UN agency chung i thlennak pawl kha American nih hmuh a duh caah a si tiah American ramleng zung in chimnak nawlngeitu nih a chim.

American nih a pek tawnmi chawva a pek ti lo ahcun a herhmi chawva caah midang bawmhchantu (donor) ram pawl nih tan kan lakpiak cio uh tiah UN nih forhfialnak an tuah.

Chawva kan i zat lo ahcun nichuah laifang ah a ummi Palestine ralzaam pawl, chuh a tongmi nitlaklei rili le Gaza in ngakchia pawl caah fimcawnnak telh in a dangdang tampi a hnorsuan lai tiah UN in tuanvo ngeitu Jan Egeland nih ralrin peknak bia a chim. Ref: BBC Burmese

Leave a Commnet

%d bloggers like this: