US Budget Hmanding An Fehter Khawh Lo Ruang Ah Cozah Zung Tampi An Khar

Chinland Post| 2018 January 22| American ramkomh cozah nih tukum budget hmanding democratic le republican senator hna (upper hluttaw) hnatlaknak ngei kho lo in an fehter kho lo ruang ah American cozah zung tampi an khar cang.

A ralaimi February 16 tiang cozah zung pawl pehzulh in rian an tuan khawhnak ding a hleikhun budget hmanding caah mee fung an zuk. Ramri runvennak le mi lutchuak (lah-wah-kah) kongkau ah alhniarnak a um i a herhmi mee 60 an hmuh lo caah atu bantuk in cozah zungrian tampi an kharnak hi a si.

Atu bantuk in tukum budget hmanding an fehter khawh lo ruang ah cozah zungrian tampi an khar ruangmang cang. January 20 thawk in innlei he aa pehtlaimi zung, pawngkam zung, fimcawnnak zung , chawlehthalnak le riantuannak zung in cozah riantuantu tamdeuh cu lahkhah pek lo in rian an dinhter chung hna. Cun, Budget lei, ngandamnak zung, runvennak le kuat phorhnak lei zung in riantuantu hnarcheu leng zong January 22 thawk in rian ah ra lo ding le kai lo ding in nawl an pek cang hna.

Cu pin ah Park cheuakhat hna le philhlonak memorial hall pawl zong an khar ve lai, visa le passport tuahnak zong a nuar deuh ngai cang lai tinak a si. Asinain rampi runvennak, post zung, vanlawng lei riantuannak, sii-inn, pawngkam runvennak le zohkhenhnak, thonginn, ngunkhuai zung, electric mei peknak zung pawl cu minung nunnak caah a biapi tukmi an si caah an khar lai lo.

Atu zung tampi le rian tampi an kharmi hi zei tik tiang dah a si lai cu hngalh khawh rih a si lo. Upadi thar asiloah nawlthar an chuah hlan chung paoh cu khar an si rih lai tinak a si.

Atu bantuk caan karlak chung a dihmi 2017 December 22 ah fehtermi a hleikhun budget upadi cu 2018 January 19 ah a dih ding a si. Tutan budget fehternak ah President Trump nih Mexico ramri vampang caah tangka a herh, Democrat nih an duh lo.

Democrat pawl nih US ram chung phung ning loin kum caan saupi a um cangmi 700,000 hrawng hi himnak pek an duh ve hna, Republican nih an duh ve lo. Pek ve i lak ve)tuah an timh nain hnatlaknak an ngah kho lo.

American ramkomh ah atu bantuk budget upadi alhniarnak ruang ah cu hlan zong ah atu bantuk in central cozah zung pawl voi 7 tiang khar an rak si bal cang. A hnu bik zung an khar cu President Obama chan- 2013 kum ah a si. Hi lio zong ah milut chuak (lah-wah-kah) zung policy kong ah budget hnatlaknak an rak ngei kho lo.

2013 kum cozah zung pawl an rak khar caan hi ni 16 chung a sau. Cozah riantuantu 850,000 hrawng rian an rak dinhter hna caah American dollar 2 billion man tluk nihlawh an rak sung.
Ref: RFA, BBC Burmese

Leave a Commnet

%d bloggers like this: