August 20 Lawng Ah Inn A Thetmi Cu Hmun Ruahpiak An Si Lai Lo; Minister Pu Sui Thio
Salai CungCung|2019 August 27| Chin ramkuh cozah nih Hakha sangthar samhmi ah phungning lo in inn sami pawl inn an thehpiak mi hna chung in cozah nawlngai in August 20 hlan minung umnak inn mah tein aa thet mi paoh cu a ruah hlan ah hmun kan tawlrelpiak hna lai i August 20 ni lawng ah inn thet mi pawl cu ruahpiak an si lai lo tiah kan theih.
“August 19 hlan tiang cozah nawlngai in mah tein an umnak inn a thetmi pawl cu a ruah hlan ah inn hmun kan tawlrelpiak cang hna lai. An mah an umnak inn a si lai, business ca men ah inn fa tete in a sami cu pawl an theh ve ko zong ah an i tel lai lo. Hi sangthar samh mi hmun ah hin minung umnak inn 40 hrawng a um. Cu inn pawl cu cozah lei nih August 19 hlan tiang nan inn thet uh kan ti hna i August 19 hlan ah inn thet mi paoh cu kan cohlan hna. August 20 ni ah cozah lei nih inn kan theh lio i a mah tein aa thet mi pawl cu ruahpiak an si lai lo. A ruang cu cozah nawlngai in a thetmi an si lo. An inn le an lo JCB in an theh ah cun thingrua le an thilri pawl a rawk dih lai ti an phan caah an mah tein an thehmi a si caah ruahpiak an si lai lo. Cun August 19 hlan tiang mah tein a inn a thetmi paoh cu tu zarh chung ah hmun kan tawlrelpiak cang hna lai. August 19 hlan ah inn thet mi pawl cu August 20 zaan ah pek ding kan timh tuah cang nain tlawmpal te an si ning a vun i fian deuh rih lo caah kan pe kho rih hna lo. August 19 hlan telh in amah tein a umnak inn a thet mi paoh cu tuzaan ah tonpumhnak kan ngei lai i tuzarh chung ah kan pek cang hna lai” tiah Chin ramkulh lamsul lei minister Pu Sui Thio nih The Chinland Post ah a chim.
“Cozah nih sangthar samh mi chung ah inn hmun zuartu hna hi minung 11 hrawng an si ti kan theih. Cun hi pawl lawng si loin a dang zong an um len rih ko lai ti kan zumh. Hi hmun zuartu pawl cu upadi ning in kan chekfel lio pi hna an si. Upadi ning in hmun ngeihnak ca pawl evident an ngeih ah cun zuarnak nawl le mi va thenhnak nawl zong an va ngei ko hnga, nain upadi ning in hmun ngeihnak ca pawl evident ngei lo in an zuar ah cun upadi ning in dantat an si ko lai” tiah minister Sui Thio nih a chim chap.
Chin ramkulh cozah nih Cawbuk lei hi Ekah 676 sangthar samhnak an timh i tu hi 300 hrawng lawng an tawlrel rih. A dang a tangmi an tawlrel dih hnu ah Hakha khuapi velnak lam le Chuncung lam lei ah phungninglo inn a sami paoh hrawhpiaknak an tuah rih lai tiah kan theih.
Hika ah Cozah nih inn an hrawhpiak lio hna video zoh chih khawh a si.
About The Author
