Avoi 2nak CPC Paih Heavyweight Champion Laksawng Ks. Sing 30 A Si Lai

Salai Cung Cung |2019 February 28| Avoi 2nak CPC (Chinland Paih Championship) Piah cu April 26 in 27 tiang Hakha Khaikam Hall ahan tuah than cang lai. Paih ningcang an then i Heavyweight champion cu ks. sing 30 le middleweight champion cu ks. sing 20 a si lai tiah kan theih.

“Tukum avoi 2nak CPC paih cu nikum nakin a nuam deuh cang. Middle Weight le Heavy Weight tiin kan then i a zohtu le aa paitu zong kumdang nakin an i nuam deuh ko lai. Cun kumdang kan tuah bal lomi Judo zong zatlang paih a dih in zuamcawh kan thawk hlan karah zuamnak kan tuah lai. Cun Online Live thlah hi tangka in kan sin ah a caw lomi paoh cu Live thlah a ngah lai lo” tiah CPC tuanvo ngeitu Salai Tum Za Sang nih The Chinland Post ah a chim.

“Hi CPC paih kan tuahnak ah Judo aa zuammi pawl hi Kawlram ramthen le ramkulh Judo zuamnak caah mi zong thim an si lai. Khuate lei in a rami Judo cawn a duhmi paoh cu Chin ramkulh zaanglek bawi nih tlunkalnak ka rinh hna lai a ti. Security caah Hakha palek le Bu mino kan hlan than lai” tiah a chim chap.

Avoi 2nak CPC paih laksawng pawl cu Heavyweight Champion Sing 30 le Middleweight Champion Sing 20 a si. Heavyweight paih ding cu Pound 150, Middleweight paih ding cu pound 149 tang an si lai.

Hi paih zuamnak Heavyweight ah aa zuam ding pawl cu Khuathar Thawng Tling, Hniarlawn Tuan Ceu, Zophei Tha Peng Lian le Senthang Van Bawi Hmun tibantuk an i tong te lai. Middleweight ah paih aa zuam dingmi pawl cu Zophei Mang Thawng Lian, Khuathar Van Ram Or, Khuafo Tawk Peng le Za Cung, Chuncung Tawk Hmun, Senthang Lian Thawng Hnin le Hniarlawn Ceuboh tibantuk an i tong te lai tiah kan theih.

Zatlang club ah Senthang, Zophei, Khuafo, Dauchin, Chuncung, Hniarlawn le Hakha Khuathar an i tel kho lai. Nikum CPC Champion cu Van Bawi Hmun a si tiah kan theih.

Na ruahning rak langhter ve.. (Leave a comment)

%d bloggers like this: