Avoi 4nak WPC Aa Pai Ding Pathawng Indiana An Phan Dih Cang; Ahodah $8000 A Co Lai?
Tawk Tling Thang| 2019 July 8| July 13, Indiana ah tuah dingmi avoi 4nak WPC (World Paih Championship) paih zuamnak caah aa pai dingmi Chin pathawng pawl Indiana an phan dih cang tiah WPC lei in thawng kan theih.
Hi kong he pehtlai in WPC haotu Pu Ang Cung nih, “Tutan ah Naga kan unau nih an kan telpi kho than lai lo. Sihmanhsehlaw, voi dang WPC paih nakin tutan hi a sunglawi in a linsa deuh thiamthiam lai. Zeicah tiah ahcun Sweden champion Sang Bik Hmung, New Zealand champion Ram Hei, Denmark champion Ro Sang Bik zong paih ruah bak ah atu hi Indiana an rak phan cang. Cu lawng si lo in ramkip, hmunkip le state kip in Lai paih thiam, pathawng pawl Mang Cung Lian, Rung Lian Ceu tibantuk zong CYONA convention zawh pah in atu hi Indiana an phan dih cang. Kir ti lo in WPC paih ah kan taang dih lai an kan ti. Ramleng Chinmi pathawng cu tutan paih ah an tling dih lai i kan i ngaih hringhran ko cang” tiah The Chinland Post ah a chim.
“Naga kan unau tutan paih ah an rat khawh lonak a ruang bik cu an ram state cozah federal uknak in an i thlen lio a si caah Chief Minister Officer tonnak le a herhmi catlap laaknak caah ni 10 tluk kan rau. Cun, visa soknak caah ni tlawmpal a rauh chap ding a si caah a nicaan nih a detkhawt tuk hna i an rat khawh lonak cu a si. November thla ah tuahdingmi avoi 5nak WPC paih ahcun an i tel kho cang ko lai” tiah a biapeh ah a chimchih.
Tutan voi 4nak WPC paih ah zuamnak phunthum a um lai. Cu hna cu;
1nak cu; Middle Weight World Champion cuhnak a um lai cucu; Salai Tial Cung Thang le Tial Uk an I pai lai. Champion cotu taisawm le &7000, a sungmi cu &2000 pek a si lai.
2nak zuamnak cu; pound 160 tang a simi middle weight zuamnak a si lai i minung 16 tiang i pai kho ding in an cohlan. Hi champion laksawng cu $5000 le pahnihnak cu $2000 a si lai.
3nak zuamnak cu; pound 160 cung a simi heavy weight zuamnak a si lai i minung 32 tiang aa pai kho ding in an cohlan. Champion laksawng cu taisawm le $8000 a si lai tiah kan theih.
Middle Weight ah special in World Champion aa cuh dingmi Salai Tial Cung Thang cu MMA-One Championship ah World Champion taisawm a cotu Aung La Nsang zong nih a rak zulh lai tiah kan theih.
About The Author
