Caankarlak Thimnak Kanpetlet Ah CPP Nih CNDP Le NLD Party A Zuamcawh Hna Lai
Chin party pahnih in thimnak aa cuhtu ding palai pahnih
City Hunter| 2018 July 9| Aralaimi November 3 ah tuahdingmi Chin ramkulh Kanpetlet peng ah CPP nih CNDP le NLD party a zuamcawh hna lai tiah Chin ramkulh thimnak commission zung in The Chinland Post nih thawng kan theih.
Hi kong he pehtlai in Chin ramkulh thimnak commission zung in lutlai U Lin Kyaw nih, “July 9 chun hnu ahkhan aralaimi caankarlak thimnak ah aa cuhtu ding NLD party in minung pahnih le CPP party in minung pakhat min cazin a phan. Cu hna cu; Matupi ramkulh hluttaw caah NLD party in U Aung Thang, Kanpetlet Pyithu hluttaw caah NLD party in U Hngunt Win le CPP party in U Mana Shin an si. Party dang le palai dang cazin cu July 9 tiang kan sin a phan rih lo. Peng le pengkomh ahcun min cazin an pek khawh men ko cang” tiah The Chinland Post ah a chim.
CNDP in Salai Ceu Bik Thawng nih, “Party pathum funtomnak avoi 5nak meeting ah a tlangpi in hnatlaknak kan rak ngeihcia cangmi cu; Matupi ah CLD, Kanpetlet ah CNDP, Tamu ah CPP i cuh ding ti a si. Cucaah, kannih CNDP nih cu hnatlaknak cu fekte i tlaih le zulh kan duh caah aralaimi thimnak ah Tamu le Matupi ah thimnak kan i cuh lai lo. Kanpetlet peng lawng ah kan i cuh lai. Kanpetlet peng in aa cuhtu ding palai cu Salai Kee Thang Lon a si. July 9 ah commission ah min cazin zong pek a si cang. Amah belte, Tamu peng ah CLD cuh an i tim i CPP zong nih Kanpetlet peng ah thimnak cuh an i tim ve ti kan theih i kan lung cu a nuam lo ngai” tiah The Chinland Post ah a chim.
Kanpetlet peng ah NLD le CNDP lawng si lo in CPP zong an i cuh lai. Chin party a si veve mi CNDP kha CPP nih thutdan kianh duh lo in NLD party he a zuamcawh te lai. Matupi peng ahcun NLD le CLD party pahnih lawng an i zuamcawh lai. CNDP le CPP nih CLD kha thutdan an kianh hna tiah kan theih.
CLD party haotu Pu Ngai Sak nih, “A ralaimi caankarlak thimnak ah Kanpetlet peng cu kan i cuh lai lo, CNDP kan kianh hna. Matupi (ramkulh hluttaw) thimfung hmunhma lawng ah kan i cuh lai. Kanmah party in aa cuhtu ding cu Salai Aung Lian a si” tiah The Chinland Post ah a chim.
Tutan caankarlak thimnak ah USDP (cianh-khaing-zi) party nih Chinram ah thimnak cuh an i timh lonak kong fiangte in an chimphuan cang caah an i cuh lai lo tiah kan theih.
ENDP (Ethnic National Development Party) party in lutlai Pu Van Cin nih, “Aralaimi caankarlak thimnak ah kannih ENDP party cu thimnak luh kan i tim lo, kan i cuh lai lo” tiah The Chinland Post ah a chim.
Zomi Congress for Democracy (ZCD) party haotu MP Pu Cin Sian Thang nih, “Tamu peng ah thimnak luh kan duh ko nain aa cuhding palai kan ngei rih hna lo. Kaa cuh lai a kan tu zong khual a tlawng i atu tiang a rak tlun rih lo caah kan i cuh kho men lai lo. Party nih cuh le cuh lo ding biakhiahnak kan tuah kho rih lo. Asinain Chinram tu ahcun cuh kan i tim hrimhrim lo” tiah The Chinland Post ah a chim.
“Tamu hi a tlangpi in Tamu ah CPP cuhding kan ti ko nain MP a rak thimi kha Thado a si. Thado phun pawl nih aralaimi caankarlak thimnak ah anmah Thado mi U Chit Maung kha naa cuh lai tiah an forhfial. Atu hi cawlcanghnak zong an ngei cang. U Chit Maung nih CLD party in kaa cuh lo ahcun pumpak (Independent) in kaa cuh lai a kan ti. Amah U Chit Maung nih commission ah cazin a pek cang le pek rih lo ka hngal lo” tiah CLD haotu Pu Ngai Sak nih kan hnuzarh ahkhan The Chinland Post ah a chim.
November 3 thimnak ah Chin party an i fonh khawh rih lonak a ruang bik cu 2018 May thla tiang ah party register a tuah ciami lawng thimnak luh khawh a si lai timi zulhphung ruang ah a si. Tamu ah CPP i cuh ding an timi kha CLD nih cuh chih an i timh caah CPP nih Kanpetlet ah cuh chih an i timh ve nak hi a si tiah kan theih. Hi kong he pehtlai in CPP party upa hna cu The Chinalnd Post nih phone kan chawnh ko hna nain aho hmanh phon an tlaih lo caah kan pehtlaih kho hna lo.
“Caankarlaknak thimnak caah Kanpetlet peng Pyithu hluttaw le Matupi peng ramkulh hluttaw No.1 mee cazin cu July 9 in 22 tiang kan tar cang. Aa palhmi a um kho, a baumi a um kho. Cazin kan tarmi ning in mee pe khotu cu Kanpetlet peng Pyithu hluttaw mee hmunhma ah milu 12,500, Matupi peng ramkulh hluttaw mee hmunhma ah milu 17,500 an si” tiah Chin ramkulh Thimnak Commission lutlai U Lin Kyaw nih The Chinland Post ah a chim.
Thimnak aa cuhtu ding palai min cazin pek caan hi July 2 in 11 tiang lawng onh a si. Hi chung ah aa cuhtu ding palai cazin aa fiang dih te lai. Min cazin pekmi zuhlaak (hrawh) than duh ahcun July 13 ah a hnu bik laak le hrawh than ding a si lai. Thimnak aa cuhtu ding palai min cazin pekmi cu July 16-22 tiang commission nih chekhlat an tuah lai.
Chin ramkulh ah MP thutdan 39 a um. Hi chung in 2015 kum thimnak tuah lio ah party kip in MP thutdan an hmuhzat cu; NLD nih MP thutdan 28, ZCD nih MP thutdan 6 le USDP nih MP thutdan 5 an hmuh.
About The Author
