CACC Nih Hakha Ah Lai-Inn (Chin Traditional Village) An Sak Lai
Salai CungCung|2019 April 9| CACC (Chin Association for Christian Communication) nih Gangaw peng Okhla khua ah CACC BM tonpumhnak an tuah i Hakha ah Lai-inn (Chin Traditional Village) sak ding in biachahnak an ngei tiah kan theih.
“CACC BM tonpumhnak ah Lai-inn sak ding tiah biachahnak kan ngei. Nain tu hi hmunhma cu kan ngei rih lo, hmunhma kan kawl hmasa lai i a tlamtlin ah cun Lai nunphun khuate (Chin Traditional Village) kan sak lai. A laifang ah Lai-inn nganpi pe 70 le pe 25 in kan sak lai lai i a pawngkam ah Lai-inn fa tete in Mindat, Matupi, Peletwa tibantuk in Lai-inn pa 10 hrawng in (Yangon i taing-yin-tha- cezua) bantuk in kan sak lai. Hmunhma tha tein kan hmuh ahcun tha tein kan sak lai i ti le mei tha tein kan tuah lai. Minung um khawhnak ding in kan tuah lai, cun lai Ar le lai Vok tibantuk zong an zuat lai. A hmun hi kan mah duh ning ah cun Ekah 50 hrawng kan duh. Mah Lai-inn sak ding kong hi tukum CACC BM meeting ah zapi lungtho tein kan ceihmi a si” tiah CACC Art and Cultural Department Secretary Rev. Khar Ling nih The Chinland Post ah a chim.
“Hi Lai-inn sak cu kan mah lei nih cun biachahnak kan ngei cang. Cozah lei tu kan chim rih hna lo, CACC -GS hruainak in hmunhma hi kan tawlrel lai. Hi hmunhma kan hmuh ah cun sak kan thawh colh ko lai. Budget zeizat dat a dih lai ti cu a fiang rih lo, a hmunhma nih a ngeih te lai” tiah a chim chap.
CACC BM meeting ah Lai-inn sak ding, Lai movie (muaitawn) tuah ding le Laihla civui tuah ding tiah kum dang ceih bal rih lomi thil phunthum an ceih. Cun Kum 72nak Chin Miphun Ni Rezua tuah dingmi ah CACC nih an tel pi hna lai tiah kan theih.+++
About The Author
