CBC Puai Kan Onh Ko Hna An Ti Nain CBC GS nih Cozah nih Tuah Kho Lo Ding An Kan Khammi A Si A Ti

Salai Josephbawi| The Chinland Post | 2020 February 7| Chin Baptist Convention(CBC) ngeihmi Chin Shalom Mission (CSM) hruainak in a voihnihnak Chin lungrualnak le daihnak (Chin Peace & Unity Conference) January 29-30, 2020 Mindat tuah dingmi cu Cozah lei nih an kham hna timi cu Cozah nih kan onh ko hna tiah an ti nain CBC GS Rev. Dr. Law Ha Ling nih tuah kho lo dingin an kan khammi a si tiah a chim.

Hi kong he pehtlai in “ Biaknak le Uknak (separation of state & state) thlei danding timi cu biaknak hruaitu nih a theilo kan um lai lo. Atu kan tuah hnawhchanmi hi miphun in biaknak in zatlang mibu vialte rualremnak le daihnak a herhtuk kan ti caah ramkhel aa tel bak lomi puai tuah dingah CBC bupi meeting le a dotdot nih hnatlaknak in kan tuahmi a si. Kum dang puai tuah ahhin ka nau le ka thlah tawn hna. Tutan cu keimah hrim nih ka telpi hna i puai halnak hi January 7 ah ca pek hna. January 26 ah an kan lehmi cu CNF an itel caah Cozah remdaihnak zung (NRPC) hnatlaknak um lo cun nan tuah kho lo an kan ti caah January 27 ah CNF an itel lai lo biaknak lei rian lawng kan tuan lai tiah biakam minthut kan pek hna. CNF an itel lai lo tiah biakamnak kan tuah ko bu ah January 27 le January 28 an kan lehmi cu CNF kong NRPC an kan leh rihlo caah kan tin lio ti lawng an kan ti. Peng uknak lei nih nawl kan in pe hna lo. Nan tuah ahcun kan in tlaih hna lai tiah an ka ti. CBC min khin atu le tu Mindat peng zung hi ka kal lengmang. Cucaah CNF an itel lai lo tiah kan ti ko bu ah ca kan tin lio nan tuah kho lo an kan ti peng mi cu hi puai tuah kho hna hlah seh tiah an itim i an kan khammi a si ko” tiah CBC GS Rev. Dr. Law Ha Ling nih a chim.

“Zan meeting zong tuah hlah u an kan ti caah January 28 zan Rawlei pah in thawngfianhnak kan tuah lai cu dih in a tlung dingmi motor kan in hlanpiak hna lai, angeilomi riahnak kan in tawlrelpiak hna lai ka ti hna. A thaizing thawngfianhnak kan tuah hlan January 29 zanlei 1:20 ah tuahnak nawl kan in pek hna an ti than. CNF an itello ahkhan tuahnak nawl pek khawh a si ko lo maw kan tin lio an ti peng i puai a dih khawh in maw puai tuahnak nawl a kan pek hnga. Chin ramkulh Cozah nihhin CBC hi challenge a tuah ko tihi ka fiangmi a si” tiah a biapeh ah a chim.

“CNF, ramkhel party le hluttaw palai pawl le biaknak lei hruaitu an itel. Cu tikah CNF telnak nawl, ramkhel party pawl telnak nawl le biaknak lei hruaitu itelnak nawl tiah phun thum in nawlpaknak kong kan ceih. CNF cu NRPC lawng nih a pek khawhmi a si. Ramkhel Party an itel ahcun anmah lila nih telnak nawl kha ramkulh le peng Thimnak zung an hal I an pekk hna lawng nih tel khawhmi a si. Meeting an tuahnak hmunhma zong zoh in thimnak zung nih maw asilo ah peng tawlreltu committee nih maw a pek lai timi zong zoh a si. Biaknak upa an itel i biaknak lei nih an tuah ahcun Biaknak zung (tatana) le peng tawlreltu committee hnatlak hna a herhmi a si. Biaknak lei lawnglawng tuah hna sehlaw biaknak zung le peng tawlreltu committee nih nawl kan pek lomi hna an um lo. CNF an itel caah nawl kan pek khawh colh lomi hna a si. January 24 ah CNF palai minung (8) cu an kai ko lai Biaknak lawnglawng kan tuah lai an kan ti than. Cucu January 26 ah CNF an itel ahcun NRPC ca kan tin lio caah tuahnak nawl kan in pe kho rih hna lo tiah ka leh hna. CNF zong nih February 2 le February 17 ah NRPC ah ca an rak tin vemi kha kan hmuhmi a si. January 27 zongah Mindat penguk bawi pa he kan ichonh. NRPC hnatlaknak aa tello ahcun pek lo ding tiin ka rak ti. January 29 ah CNF le Ramkhel an itello ahcun tuahnak nawl rak pe ko hna u tiah NRPC nih an kan thanh. Cu bantuk cun Chin Ramkulh Humhimnak Vuanci zong nih a ka chonh ve January 29 zing 8:37am ah tuahnak nawl thawng kan thanh hna. Mindat penguk pa nih January 26 ah tuahnak nawl kan pek hna lo caah an tlung dih cang tiah a ka chonh I an tuah ti rua lai lo tiah ka rak ruah. January 29 Mindat biakinn ah thawngfiannak kan tuah lai cu ahcun CNF, Ramkhel party zong an itel lai tiah Mindat penguk nih thawng a ka thanh caah cu thawngfianhnak cu nawlpek lo in tuah a ngah lo tiah Mindat palek, Upadi, Peng tawlreltu va chimter hna u tiah ka ti hna nain chun 1:30 ah an dih cang tiah thawng ka theihmi a si. NPRC le Cozah rianngeitu hna zong thawng ka van thanh chim hna. Tulio Online Media ah Chin Ramkulh Cozah nih CBC meeting tuahnak nawl a pe hna lo. An pek zongah caan naihtuk in a pek hna ti hna in thawng an zamh. January 29 ah tuahnak nawl kan pek hna timi zong kan thanh colh hna. CNF an itel ruangah kan pek khawh lo mi hna zong kan in pe kho hna lo tiah rang ngaiin thawng kan ipe ko. Cucaah thil sining fiang tein theih cio dingin chim ka duhmi a si” tiah Chin Ramkulh Cozah le Chin Media tonnak ah Chin Ramkulh zung Director U San Thun Sein nih a chim.

“Avoikhatnak puai tuahnak nawl an va hal ahhin Chin ramkulh ah daihnak a um ko tung, CNF an itel/sawm hna ahcun kan in tlaih hna lai tibantuk, CNF kai an duh ahcun anmah te in NRPC kainak nawl ihal hna seh ti bantuk Cozah lei nih an ti hna tikah CBC zong nih lungsau tein ca an tial an izuam ve. Kanmah zong nih NRPC ahcun kan tial ve. Angai ti ahcun tikhan thil kalning asilo. Chin State Govt. tu nih cu bantuk puai tuah an timh le CNF kai an itim caah zeitin dah nan ruah ti kha an ti hnga i NRPC nih pe hna u pe hna hlah u ti ding kha a si. Cu tikah NRPC kan hal tikah thil sining kha an rak thei ve tilo. A ngai ti ahcun Cozah le Cozah in ipehtlaih ding a si i kanmah le cunglei Cozah direct in pehtlaih chonter phung a silo. Riantuan an thiam lo tikah nawl pek le peklo ah an ilaklawh dihmi kha a si. January 27 ah NRPC hnatlak lo in CNF an itel lai lo tiah biakam hnatlaknak an thutter cang hna tikah kan ngah lai ti an iruah. January 28 zongah NRPC hnatlaknak nan ngah rihlo caah nan tuah ahcun upadi ningin kan in tlaih hna lai an ti hoi hna cu aw. January 28 Mindat cu ka va phan i CNF tello in puai pek ding a si ko ahcun kan kai lai lo tiah CNF upa chimh hna. Cu zan lila ah Chin Ramkulh Cozah ka chonh hna i ka manhlo ti men le chonh than te ding ti zong an kan chon than tilo. Cucaah NRPC ka chonh hna, CNF kan kai ti lai lo. Peklo cu Chin ramkulh Cozah le Cozah nan min a chiatuk lai ka ti, athatuk nan kai lo ahcun puai tuahnak nawl pek dingin ka van chonh hna lai an ti. Lungtak tein anmah le anmah zong an ichonh rua lo. Cu bantuk in keimah nih rak chonh hlah hna ning law puai tuahnak nawl pek an chuah thanmi hna kha a si rua ka ti.” Tiah CNF Asst. Secretary Dr. Sui Khar nih The Chinland Post ah a chim.

“CBC Baptist Khrihfabu 907 fonhmi i an General Secretary pi cu mi sawhsawh a silo, alian tuk cu mu. Kanmah tel le tello ruang I puai an tuah khawhlomi cu ka lung atha lo tuk. Rev. Law Ha Ling cu Mindat penguk pawl nih an auh salam, ca an tialter salam cu aw. Midang si hna sehlaw an tuah hnga ma mu. Hihi cu an Cozah zong nih tanglei an nau le an chim hna deuh awk a si. Myone hmu menmen nih zungah hun ra ti menmen cu a si awk a silo. January 29 zing ah zung ah rak ra an ti hoi i mah ni bel cu ka manh lo a ti ve hna rua i catu in an ve pek. Chin ramkulh ah daihnak a um ko tiin Cozah nih an ti mi hi an ruah deuh ahau. Chin cungah biaknak hoih in pengtlang hoih in kan hmuhthiamlonak hi kan ilungruallonak le kandaihlonak hi CBC nih an ruah i an tuahmi a si cu. Hi bantuk puai pi mipipa a kaiding cazin pekin nawlhalmi cu tuahnak nawl pek khawh le khawhlo timi a tlawmbik ni (5) tal in an pek hna ding asi. CNF nih anmah tein NRPC ah ca tial hna seh ti rengreng kha a dikmi a si lo” tiah a biapeh ah achim.

Hi kong he pehtlai in “ tutan CBC a tuahmi hi a tha tukmi a si. CNF lei minung (8) a kai dingmi NRPC lei hnatlaknak ka ngah a tlai tuk caah nawlpeknak a tlai bia a si. Kanmah cu biaknak lawng puai tuahmi lawng onhnak nawl kan ngei” tiah Chin Ramkulh chimrelnak nawlngei Vuanci Soe Thet nih Media he February 3, 2020 ah a chim.

“ Biaknak nawl nawl pek khawhmi kan si. CNF an itel ahcun NRPC nawl a herh ruangah a si. Biaknak puai cu January chung hmanh ah phu (10) leng tuahnak nawl kan pek hna” tiah Chin State CM Salai Lian Luai nih Media he February 3, 2020 ah a chim.

Chin Baptist Convention nih dirhmi Chin Shalom Mission (CSM) hruainak in Chin miphun lungput ruahnak aa thenmi lung ihmuhthannak ca le daihnak (Chin Peace & Unity) conference cu 2019 January 17-19 tiang avoikhatnak Falam ah rak tuah a si i 2020 hi Mindat tuah an timh nain Cozah nih a caan lio ah tuahnak nawl pek hna lo caah tuah khawhlo in an um hi a si tiah theih a si. Hi puai tuahnak ah Chin National Front, Chin Zatlang Bu, Chin ramkhel party le MP hna le Biaknak lei hruaitu minung (150) leng kai dingin sawm an si tiah theih a si. +++