Chin Ramkulh Cozah le Chin Media Tonnak February 3, 2020 Chungin Biahalmi le Bialehnak Tawi

Chin ramkulh coza

Salai Josephbawi| The Chinland Post| 2020 February 5| The Chinland Post nih Chin Media le Cozah tonnak ah biahalnak (18) kan tuah hna. Cu chungin zapi theih awk tha timi a tawinak tete in kan van langhter.

  1. Chin Baptist Convention (CBC) mindat puai tuahmi cu CNF an itel ruangah National Reconciliation and Peace Centre (NRPC) hnatlaknak an ngah lo caah a tlai deuh hnu lawngah puai tuahnak kan onh khawh hna tiah Chief Minister, Vuanci Soe Htet, Chin State Govt. Director U San Thun Sein hna nih a chim.
  2. 2nd Chin National Day Thantlang cu Pengkip nunphung bu le mizapi itel cio dingin Chin ramkulh Cozah nih a kan sawm. Hi CND ahhin Kawlram State Counselor Aung San Suh Kyi or President pakhatkhat cu an ra ko lai nain aho a ra lai tiah a kan chim kho rihlo.
  3. February 12, 2020 Union Day cu Thantlang ah Chin Ramkulh Cozah hruainak in an tuah lai tiah Vuanci Soe Htet nih a chim.
  4. Chin National Day cu Ramkulh Zung khar nih ah official in a si kho lo tiah an kan leh. A ruang cu Kawlram miphun kan tam caah hi bantuk zungkhar nih kan tuah ahcun a buaibai kho dingmi a tam caah kan pek khawh lonak a si an ti. CND ni cu Puai a si caah zungkhar ni tiah official kan thanh lo zongah zungkhar cio a si ko tiah an ti. (Chin State Govt. Director U San Thun Sein)
  5. Thantlang Zarhpi ni zing sml 6-9am kar mei a mit lengmangmi cu CND lai a si caah mei an tuah he aa tong kho mi a si tiah Vuanci Soe Htet nih a chim.Electric zung Facebook Page le Media hmangin mei a mit caan mizapi kan thanh lengmang u tiah kan forh hna.
  6. Timit Dinti puai cu February 11 ah an tuah cang lai. K & DL Company taza cuaimi zong February 10 ah bia an iceih lai. A thatnak bik in kan tawlrel ko tiah tiah Vuanci Soe Htet nih a chim.
  7. Ral Hmung Certual hrawh in Shopping Mall sak ding timi cu Chin Cozah le Khuathar mizapi tonnak an ngei bantuk in anmah le anmah tha tein an iceih hnu ah Cozah lei nih a herhning in kan tawlrel lai tiah Vuanci Soe Htet nih a chim. Hramhram in kan nor hna lai lo nain an duh lo taktak ahcun Upadi phungningin kan tuan ko lai. Certual kan hrawh sual zongah a thlang lei ah tha taktak in tuah kan timhmi a um ko a ti.
  8. Hakha Ekah 676 kongah Thongtlami le Chin Ramkulh karlak tazacawinak cu thongtla mi le tette biahal ding an tlin rihlo caah arauhnak a si tiah an ti. Cu hmunhma I Ekah 532 hmannak nawl Ramkomh Cozah nawl an ngah caah a tutiang inn hmun phawtzamhnak an tuah kho rih lo tiah Vuanci Sui Thio le Vuanci Soe Htet nih an chim.
  9. Chin ramkulh ah Tolreba Sehzung Mindat ah on a si cang. Pengkhat ah Kyats sing 1500 cawih ding zong an tawlrel cuahmah. Sehzung tuahnak bel mah peng cio a ti kho mi nih izuam in Cozah nih a herhmi tuahnak nawl onh a si lai.
  10. Coronavirus kong he pehtlai in Chin ramkulh Rikhuadar, Tonzang peng Dalkhai le Khaikam ah check cuahmah an si ko. Biakinn kip le zapi ralrinnak ngandamnak zung lei in an pek cuahmah tiah kan theih.
  11. Thantlang Lahwahkah zung nih Hmahpuntin tuah paoh ah ahlu Ks.10,000 in a cunglei halmi kongah a report tu nan um ahcun fakpi in dan kan tat hna lai tiah Vuanci Phwe Arr nih a chim.
  12. Paletwa Sayamay te minung 207 leng nih Paletwa in thialnak an sok. Minung 67 cu Chin ramkulh lenglei ah an sok I a tangmi lawng ramkulh chung thialding in an sok. Sayamah te an izat lo caah Ramkomh Cozah lei nih chiahpiak ding aa fian hlan lo cu chim awk atha rihlo lo tiah Vuanci Soe Htet le Vuanci Phwe Arr nih an chim.
  13. Surbung Airport cu 37billion dih in sak cuahmah a si. May thla dih in June thla ah onhnak tuah ding timhtuahnak an ngei. Lailenpi Airport zong June thla hrawng lawngah on khawh a si te lai. ART 71 minung 72 aa tlummi Vanlawng a um kho lai. Hakha Thantlang Tedim tbk a dangdang halmi zong Dr. Sa Sa te abawmtu hna AMF tbk bawmhnak an um lawngah tuah khawh a si lai. Ramkomh Cozah bawmhnak in cun tangka a dihtukmi a si caah ruahchannak a um lo tiah Vuanci Sui Thio nih a chim.
  14. Chin ramkulh ah Zu License phun (10) a um. 2013-19 kum tiang ah License 178 a um I 2019 Chin ramkulh Cozah hnatlaknak in a thar 102 chap a si. Azapi in 280 a ummi cu ngunkhuai kaih an si. Sing 5 lak tawnmi kha sing 11 tbk in a kai tiah Chin ramkulh Cozah Director U San Thun Sein nih a chim.
  15. Victoria tlangah Vailamtahtung cu a thar an tuah mi a si caah nawl onh awk a tha lo. Kan ngolter hna. Ahlun remh lawng kan onhmi a si tiah Vuanci Soe Htet nih a chim.

World Bank bawmhnak in Kalay-Hakha kar lamkauh dingmi cu 2023 lawngah dihding tiah nawl an ka hal nain arannak tuah ding tiah ka ti ko hna. Kan term ahcun ruahchannak a um ti lo tiah Vuanci Sui Thio nih a chim.

Na ruahning rak langhter ve.. (Leave a comment)

%d bloggers like this: