Chin Miphun Ni Dawrkhan Man A Fak Chin I Ks. 250000 Tiang An Hauh
Salai Cung Cung |2019 February 11| Akum 71nak Chin Miphun Ni ah Dawrkhan 46 hrawng an hun cang i dawrkhan pakhat ah ks. 250,000 tiang an hauh tiah kan theih.
“Tu tiang ah cun dawrkhan 46 hrawng tiang kan hun cang. Tukum cu dawrkhaan a haltu minung an tam deuh caah khanhnih pek si lo in khankhat cio lawng pek an si lai. Biaknak lei tibantuk le a lenglei Group pawl cu certual a hnulei a that deuhnak le a sau deuh khaan pawl kan thimpiak hna. Anmah nih cun Khanhnih cio hi an duh nain minung hi kumdang nakin a soktu an tamdeuh caah khankhat cio kan pek hna lai. Certual Goal tung hnulei thilzuarnak caah kan rak tuah tawnmi kha cu booking liopi a si i February 14 hrawng ah khin zeizat ti cu a fiang te lai. Booking a tuahmi hi tu tiang ahcun 30 hrawng an si cang” tiah Hakha peng Ngunkhuai zung lutlai Pu Khin Maung Taan nih The Chinland Post ah a chim.
Dawrkhan pakhat ah meikau lonak company thil zuarnak pawl cu khankhat ah ks. 250,000, cun eidin dawr lakphak le sathluak tibantuk zuarnak caah ks. 150,000 an si. Tukum hi kumdang nak in a soktu minung an tam deuh. Dawrkhaan a sok i a ngah lomi an tam ngaingai ti ah kan theih.
Tukum Chin Miphun Ni ah Zuu le Beer tibantuk rihhaisii zeihmanh certual chung ah zuar khawh a si lai lo tiah tuanvo ngeitu sin in kan theih.
Nikhum ah Dawrkhan man hi ks. 100,000 in ks. 200,000 kar a si. Tukum cu 150,000 in 250,000 tiang a phan. Hihi tuanvo ngeitu nih laak ding in ret an khiahmi a si. A cheu cu tangka an apter rih hna lo. Tuzarh chung ahcun dawrkhaan a latu paoh tangka an liamter cang hna lai tiah kan theih.
About The Author
