Chin Ramchung Ah Kumtling Lo Ngakchia Tlaihhrem A Tam Chin

Salai CungCung |2018 September13| Chin ramkulh chungah hlan deuh ah cun kum tling lo ngakchia tlaihhrem hi um tuk lo nain tu kum chungah kum tling lo ngakchia tlaihhrem mi voi 4 a si cang, cu tlaihhrem tu pawl cu faak pi in hremnak an pek hna tiah Social Minister Pu Paw Lun Min Thang nih a chim.

“Kum dang ahcun um tuk lo, tu kum cu thla 5 thla 6 kar ah voi 4 bak a si caah tlawmpal cu kan thin a phang ko. Hi kum tling lo ngakchai tlaihhremnak kong he pehtlai in keimah lei in ka chim duh mi cu, faak piin dantatnak pek ding an si. Cun biaknak lei in siseh a dangdang phu lei zong in cawnpiaknak tampi ngeih ding ah ka duh” taih Chin ramkulh Social Minister Pu Paw Lun Min Thang nih a chim.

2018 September thla tiang ah Hakha peng kum tling lo ngakchia tlaihhremnak voi 2, Falam peng ah voi 1, Matupi ah voi 1, azapi voi 4 a si cang tiah kan theih. Cu a tlaihhrem tu pawl cu thong ah kum 20 thlak an si lai.
“Chin ramkulh chungah cun khirhfa nunphung he khat le khat i theihthiamnak a um, hi pawl kong ah hin cun theihthiam ding si lo, sualnak an tuah a si ahcun an sual tuah mi hi caan sau um pi lo in a rannak in dantatnak pek colh ding an si ko” tiah Pu Paw Lun Min Thang nih a chim chap.

Kum tling lo ngakchia tlaihhrem a tlawm deuhnak ding ah sualnak a tuah tu pawl hi a fak bikmi dantat pek an si lai i biaknak lei in siseh, sang le veng khua mi nih biatak tein tanrual ti a herh ko tiah Minister nih a chim. Tlaih hrem a tongmi ngakchia hna cu Chin ramkulh cozah nih minung pakhat ah tangka Sing 1 cio a bawmh hna tiah kan theih.+++

Na ruahning rak langhter ve.. (Leave a comment)

%d bloggers like this: