Chin Ramkulh Covid Zawtnak Ngei 130 An Um Cang

0

Salai Bawi Lian Sang| TCP-Kalay| December 3, 2020| Chin Ramkulh chung ah COVID-19 zawtnak a ngei mi December 2 ni tiang ah minung 130 an si cang i, atu lio ah minung 27 sii-inn ah an um rih, tiah thawngtheih a si.

Chin ramkulh Covid-19 pulral runvennak cu peng kip cio ah pulrai runvennak tawlrelnak committee an ngei cio. Mah pengkip committee   nih khualutnak check-gate ah ramchung ramleng/ramthen in lut mi hna cu facility Quarantine Ni(14) chiah in swab test tuah an si. Thilphorh motor mawng Driver le hnuzual pawl cu minute (15) can pek in Rabid Test Kit an si. Zawtnak hrik hmuhmi hna cu Facility Quarantine ah swab test an tuah chap hna.

Chin ramkulh chung in Hakkha peng Covid-19 pulral runvennak committee nih Hakha khua lutnak check-gate ah Thilphorh motor mawng Driver le hnuzual pawl cu minute (15) can pek in Rabid Test Kit an si. December 2, ni tiang ah Hakha lutnak check gate Swab test nak in covid-19 hrik ngei minung (6) an hmuh cang hna tiah Chin ramkulh Transportation zung lutlai U Saw Myint Lwin sin in  thawng kan theih.

Hakha lutnak check gate Swab test nak ah October 9 in December 2 ni tiang ah motor dihlak(1389), Swab test mi driver le motor hnu zul dihlak(2169) ah zawtnak hmuh minung(6) an si tiah U Saw Myint Lwin nih a chim.

Chin Ramkulh chung ah COVID-19 zawtnak a ngei mi minung 130 chung ah minung 103 cu an dam cang i, sii-inn chuahter an si cang. Minung pakhat zawtnak in a thi.

Chin Ramkulh Peng 9 chung ah Thantlang le Kanpetlet dah ti lo a dang khuapi ahcun zawtnak a ngei mi thlopbul lio an si. Atulio ah a um mi hna cu, Mindat Sii-inn ah minung 6, Matupi ah minung 5, Hakha ah minung 6, Paletwa ah minung 4, Tonzang ah minung 3, Falam ah minung  2 le Tedim ah minung 2 an um, tiah theih a si.

About The Author

Na ruahning rak langhter ve.. (Leave a comment)

%d bloggers like this: