Chin Ramkulh Cozah Lutlai Erh An Si_ Kawlram Vice President Henry Van Thio Tlaihkhihmi Sinak in A Him

Salai Josephbawi| 2021 February 1| Kawl Ralkap nih 2020 Kawlram Thimnak November (8) ah tuahmi Thimnak cu lunghrinhmi Thimfung (10)million tluk aa tel tiah an kherhhlai I Kawlram Thimnak Zung _Union Election Commission (UEC) ah voikhat le Pyitaungsuh Hluttaw lakhruak meeting auh piak dingin a hal nain ceihpiak a um lo caah nihin February 1, 2021 ah hramhram in Kawlram nawlngeihnak nawl a lak. Hi Nawlngeihnak a lak lio ah Kawlram Ramkomh Ruahnak petu State Counselor Daw Aung San Suh Kyi, Kawlram President U Win Myint le ramkulh ramthen Vuancichoh pawl tlaihkhih an si nain Vice President Henry Van Thio cu tlaihkhih tong lo in a him tiah a mah he aa naihniammi sin in thawng kan theih.

Amah he aa naihniammi pakhat nih “ Vice President hi a dang bantuk in tlaihkhih a tong lo. A him. Lengchuah kha cu a ngah cio lo I inn ah tluang tein a um ko. Thlacampiak kan herh. A dang bia le hla a um len lai nain ralrin tein chimrel le thutdir zia kan thiam cio a herh” tiah The Chinland Post ah a chim.

February 1, 2021 Ralkap Zung lei thawngthanhnak (1/2021) ningah UEC le Pyitaungsuh hluttaw auhpiak ding timi an auh lo ruang ah nawlngeihnak an laknak kong, UEC a thar dirh in thimfung cazin relthan a si le silonak, COVID-19 runvennak felfai tein tawlrel a si lainak, COVID-19 nih a denmi cawlet riantuannak tharchuah than ding, NCA ningin remdaihnak zuam aa timnak, Lakhruak nawlngeihnak caan a dih in 2008 phunghram ningin thimnak kan tuah lai i zaukphung ningin a teimi ramkhel party sin ah nawlngeihnak pek a silainak hna an langhter.

Caan karlak Kawlram President ah Ralkap aiawh in Vice President a simi U Myint Shwe pek a si.

Chin Hluttaw Speaker Pu Zo Bawi, Chin ramkulh Cozah Vuacichok Salai Lian Luai tel in Vuanci dihlak cu Hakha um Vuanci pawl umnak inn ah ralkap nih an congh hna lengah Chin ramkulh Cozah zung, Hluttaw zung zong ralkap phu (10-20) nih an congh. Ralkap le palek pawl zong khuachung ah a pikpak in an ichok lengmang hmuh an si.

Ralkap nih Nawlngeihnak a lak ruangah Hakha inntek khuachung cu facang, eidin aa cawk ciami an tam ngai ngai. Khuachung ahcun mi chokvak an um nain mit-au hoiher aa dang ngai.

Hakha ah Phone line a ngahmi Telenor cu a ngah peng ko nain Mytel, MPT, Ooredoo,Wifi internet vialte cu zanlei 3:00PM tluk tiang phih dih a si. Internet a ngah lo caah Myanmar Economic Bank dah tilo CB Bank, Innwa Bank, Irrawaddy Bank, KBZ Bank hna cu phih a si.

2021 February 1 ah Myanmar Ralkap nih an tleih cang mi hna min list theih khawhtawk