Chin Ramri Ah Chingchiahnak Ramri Tung Kan Phun Lai; Minister Mang Hen Dal
Chin ramkulh Minister Mang Hen Dal
Salai Elvis| 2018 November 22| Thla khat hnih chungah rianthok kho dingin Chin, Sagaing, Magwai ramri hna ah chingchiahnak ramri tung kan phun lai. Hi chungah pyi-the-zi tawlrelnak in rampi cozah, Chin ramkulh cozah le mizapi thazaang zong tampi i tel kho cio u tiah November 19 Chin ramkulh cozah an riantuan mi chimhfiannak an tauh ni ah Chin ramkulh Thingram le Zuatkhalhnak lei Minister Mang Hen Dal nih a chim.
“Thingram zung, sakremhnak le uknak lei tiin ramri tahmi vawlei an um i hi chungah uknak lei in tahmi ning in kan tuah lai. UTM le Google Earth in a langh ning zong in kan tah lai lo, a hlan lio a si ningtein tah a si lai” tiah a chim.
Atu bantuk in 1938 kum ah ramri tung rak phun cangmi cu ramri det duh ruangah phungning lo thing aah nak, dum le lo caah vawlei hmunhma i peknak ruangah a hlan lio ramri tung cu thialkam lengmang a si caah a dikfel tein ramri sining aa fian khawh lo caah a thar in chingchiahnak tung phun than an timhnak a si.
“Hi kongah a fekmi tette (thil sining) kan kawl i ramri tung hna cu Tonzang, Tuikhing, Yarzagyo, Khaikam, Thuma, Hakha lei ah Zawngnak, Matupi lei ah An-da, Kanpetlet le Mindat lei tu khi Saw he ramri kongah rak buaibai pah a si. Hi kongah rampi cozah sin ah rak chim a si i a luancia October 17 ah Daw Aung San Su Kyi nih Pyithe-zi hruainak in le tuanvo ngeitu hna nih zohfel in Chin, Sagaing, Magwai ramri hna tung phunding a ti. Hi chungah rampi cozah, Chin ramkulh cozah, Hluttaw tel in mizapi thazaang zong tampi a herh lai caah ram dawtnak he nan kan bawmh cio naklai kan nawl hna” tiah Minister Mang Hen Dal nih a chim.
Hi chungah Chin ramri an rak tahnak kum, Chin ramkulh tiah min rak peknak le Chin ram tuanbia zong tampi a chim.
About The Author
