Chin United FC Pumpululh Phu Chinram Cozah Nih Conglawmhnak A Tuahpiak

Salai Elvis| 2019 August 5| Myanmar National League II 2019 ah Champion a cotu Chin United Foodball Club pumpululh phu cu Chin ramkulh cozah nih July 3 Khaikam zaanglek zungah conglawmh upatnak sunglawi ngai in a tuahpiak hna tiah kan theih.

Mah ni ah Chief Minister Salai Lian Luai nih, “Atu bantuk in Chin United FC Champion an ngah nak thawngin tawlreltu lutlai le pumpululh phu sin ah ramkulh cozah le mizapi ai-awh in a lunglawmhnak bia, pumpululh celhnak hi vawleicung mi nih an uar bikmi a si nak kong, hi bantuk in miphun pi hmai zong nan hngalternak kong le hi nak thiam le sang deuh in nan  zuam chin i ram le miphun mithmai le limhang a thattertu a si caah i zuam chin ding in” forhfialnak a ngeih hna.

Mah ni ah CM Salai Lian Luai le Hluttaw Speaker Pu Zo Bawi nih Chin United FC sin le an lutlai hna sin ah conglawmhnak roca peknak le Minnister Pau Lun Min Thang nih pumpululh aa celhmi pakhat cio sin ah  lawksawng a pek ve hna i Chin United FC lei lutlai lei in Dr. Jame Lian Sai nih lunglawmh biachimnak le Champion an hmuhmi Cup zong ramkulh cozah sin ah pekchanhnak an ngeih hna. Mah zan ah Chin ramkulh lei nih rawldanghnak, Lai laam le hlasaknak in caan an hmanpi hna tiah kan theih.

Leave a Commnet

%d bloggers like this: