Chin Zapi Huap Kho Tho Puai Min Bunhnak Kong CACC Nih Ceihhmainak A Tuah Lai

Salai Cung Cung |2018 September 22| CACC tawrelnak in Chin Miphun nih kan ngei mi ni sunglawi ‘Tho puai’ min cu Chin ramkulh chung um mi dih lak nih i hrawm khawh ding in holh phunkhat ah ser an timh tiah kan theih.

Hi kong ceihmai nak cu a ralaimi October 5- 6 tiang CACC zung ah an tuah lai.

“Hakha nih ‘Tho puai’, Falam nih ‘Fanger Puai’, Tedim nih ‘Khuadopuai’, Zaingiat nih ‘Dawngpui’, cun Mindat le Matupi lei zong nih a dangdang min cio in ngeih a si. Cu vialte holh in auh mi cu a suallam (definition) aa khat dihmi a si ko caah aa khat dih komi cu min tampi in auh loin min pakhat ah sak kho u si law ti hi kan duh.

Tahchunhnak ah Kachin lei zong nih an mah le Tho puai min te an ngei ve, cun a dangdang zong an mah le Tho puai cio cu sunhsak ngai in le sunglawi ngai in an hmang hna i cozah nih zung tiang an khar piak hna. Cucaah Chin mi cu miphun pakhat bak kan si ve ko caah Chin National Day Pakhat lawng kan ngei. Chin Miphun ni nak hman in a sungluai deuh mi kan pipu chan in raldohnak hmanh a rak um hlan kokek taktak in puai sunglawai kan ngeih mi cu hi ‘Tho puai’ hi a si.

Cucaah ma hi cozah lei zong nih hi Tho puai hi Chin miphun zong nih an ngeih ve ko ti mi hi kan theih pi ve hna seh law ti kan duh.” tiah CACC Art and Culture Department Secretary Rev. Khar Ling nih TCP ah chim.

Laimi umnak kip ah a va si khawh lo hmanh ah Chin ramkulh chung tal ah hin cun zung khar ni tiang si kho seh ti hi kan mah CACC Art and Culture Department nih seminar tuah kan i timh mi cu a si. Hi meeting ah hin Hakha, Falam ,Matupi, Tedim lei tuanvo ngeitu le ka dangdang in Meeting ah ruahnak an chuahpi cio lai i Tho puai min khat in a chuah khawhnak ding in kan tawlrel lai i Chin ramkulh cozah sin ah kan chuah pi te lai.” tiah Rev. Khar Ling nih a chim.+++

Na ruahning rak langhter ve.. (Leave a comment)

%d bloggers like this: