CNLD Hi Chin Miphun Party A Si Lo Nan Ti Maw?
CNDL le Holy
By: Salai Holy Tawk Tling Thang
Nai hrawng ah social media le ka pawngkam Hakha khuapi chung hrimhrim ah mino, upa, tar thlu lo sin in ka theihmi aw le ca cu, “CNLD hi Chinmi zapi nih tonbiaruahnak in dirhmi a si lo caah Chin miphun party a si lo” ti hi a si. Hihi, zei bantuk tahfung le phunglam in dah an chim hnga? Mitcaw pathum rulpi tongh bantuk in an hei chim sawhsawh i a si ko lai dah ka ti. Hi kong he pehtlai in Chin miphun nih kan i fian awk a herhmi tawite in langhter ka duh.
Catialtu hi CNLD siseh, zei party hmanh ah party member a lutmi le a rak lut balmi zong ka si lo ti hi a hmasa bik ah chimtak ka duh.
CNLD hi Chin mizapi ton biaruahnak le hnatlaknak in dirhmi a si lo caah Chin miphun party a si lo timi hi mihrut ngakchia bia a si. Rev. Dr. Tuan Peng Thang bia kan i hlan ahcun, hi bantuk biachim le catial cu “Molh hmanh ah molhkemh” bak khi a si. A ruang cu;
- Tlangcung miphun vialte nih miphun party an ngei cio dih. Asinain, miphun party dirhnak ah an miphun zapi ton biaruahnak ngeih in dirhmi an si hlei lo. Kawlram lawng si lo in ramdang um miphun kip cio zong an si thiamthiam.
- USDP le NLD party cu Kawlram ramthen le ramkulh kip ah zung hun dih a si. Sihmanhsehlaw, NLD/USDP party rak dirh lio ah miphun kip le ramkulh, ramthen kip aiawhtu minung vialte i thlah in dirhmi a si hlei lo. Mi tlawmte ton biaruahnak in rak dirhmi a si ko. NLD hoihna cu central committee ah Chinmi pakhat hmanh an i tel lo, cangkep (ayan) lawng ah an telh hna.
- Atu lio Rakhine nih ALP le Shan nih SNLD tiin miphun party an dirhmi khi an mipi nih miphun party bak a si tiah an cohlan. Asinain, an rak dirh lio ah Rakhine ramkulh pengkip minung ton biaruahnak in dirhmi a si hlei lo. An dirh kum zei maw zat a luan hnu ah an cohlan i an dirhkamhmi party a si ve ko.
Cucaah, Chinmi zapi asiloah Chinram pengkip upa vialte tonbiaruahnak lawng in dirhmi khi Chin party tiah kawh auh ding timi khuaruahnak le lungput cu a ngakchia lungput le biachim a si. Ngakchiat lawng hmanh khi si lo in ngakchia molh asilole mihrut ngakchia lungput, biachim le catial a si.
Miphun party tiah kawh auh khawhnak ding tahfung cu aa tinhmi suttung le party policy lungput ahkhin Chinram le Chin miphun himnak le thanchonak hrambunhmi a sinak ahkhan aa hngat. Chinram pengkip an i tel le tel lo ah siseh, zapi ton biaruahnak in dirhmi a si le si lo ah khin aa hngat lo. Cun, party lutlai hruaitu mifel a si le si lo zong ah aa hngat lo. Amah belte, party nih phunghram le policy a tuah tikah Chinram le Chin miphun a huap khomi lungput le policy kha a tha bik in a kalpi cu a herh ve. Tedim le Tonzang ah Zomi pawl nih ZCD an dirh, annih cu Zomi ca lawng ah dirhmi a si caah Chin miphun party a huapmi a si lo zia an party policy le tinhmi zoh in hngalh khawh a si.
Miphun Party cu dirh lio ah mi tlawmte an si zong ah Chin mizapi a huap khomi party a si khawhnak ding i hmaithlak in kaupi in kutka a hun le felfai te in party conference a tuah i zapi duhnak in hruaitu i thim, party policy le phunghram a herh ning in thlenremh khawhnak phunglam a tuah cu a herh ve. Atu CNLD nih khin thimnak a dih cangka in an tuah lai ti zong ka zumh fawn.
Miphun Party muisam le dirhmun cu minung tlawm, tam le hruaitu upa ah aa hngat lo, a bik in party policy ah aa hngat. Cucaah, atu
CNLD party i thithruaining le a riantuannak zoh tikah tlamtlinlonak chambaunak tampi a um ko lai, nain party policy le hmailei a chunmang zoh tikah Chin miphun party a si tiah raltha tein chim khawh a si.
Cu ve bantuk in CNLD hi miphun party a sinak, atu lio hruaitu upa nih luban sinak kha ro bantuk in an i tlaih lo zia kha 2021 party conference pi ah an langhter hrimhrim ve cu a hau lai. Thutdan nakin miphun ca riantuantu taktak an sinak limhang kha tutan thimnak ah zumhtlakte in an langhter zong a hau lai.
Salai Holy Tawk Tling Thang
2020 July 9
Biakilh: Hi cabia cu catialtu pumpak hmuhning a si. Zalongte in share tuah khawh a si.
About The Author
