COVID-19 Ruang Hakha Kawl Titoih Puai Tuah Lo Dingin Ramkulh Cozah Nih A Kham
Salai Elvis|2020 March 10|Kawl Miphun nih Hakha ah kumkhat voikhat tuah tawnmi Titoih puai (Thingyan) cu COVID-19 zawtnak ruang ah tuah lo dingin Chin cozah nih an kham tiah an theih.
Hi an khamnak kong cu cozah thawngzamh ca a si mi The Mirror Daily zongah thawngthanhnak tuah a si cang.
“Tukum Hakha Titoih puai (Thingyan) kan khamnak a ruang cu COVID-19 zawtnak a karh tuk caah le Titoih puai zong hi mitampi le miphun kip cawh a si tikah Hakha lawng si lo in khua dang pengkip cio zongah thul dingin theihternak tuah an si hna. Hi zawtnak cu mi an i but nak hmun deuh ah i chawnh a fawi caah kan nih cu hi zawtnak in i khamnak kongah kan fimthiamnak le thil le ri zong kan ngeih lo tikah a hlan kan i runvennak cio, mi bupi umnak hmunhma a si mi puai tibantuk ah kal lo ding le hrial cio ding kha ho cio paoh kan rian a si ko. Hi kongah Khrihfa bu le a dangdang nih ngeih cio mi Khawmpi le puai tibantuk ah Ramkulh cozah nih kham le tuah lo ding tiang in thloh cu kan tim lem hna lo, an mah nih an tuah ding puai umtuning tu ah aa hngat mi a si ko.”tiah Chin ramkulh chimphuannak nawlngei tu Sipin vuanci U Soe Htet nih The Chinland Post ah a chim.
Atuni tiangah COVID-19 zawtnak aa pehtlai mi Chin ramchungah minung pakhat hmanh an um rih lo. Pehtlaihnak a si mi India ramri Gate zong India cozah lei nih an phihkhar cang hna. March 10 cazin ningin a tulio Kawlram chungah hi bantuk zawtnak a ngei kho tiah ngiatthlai mi minung 79 le lunghrinh mi minung 2 an um tiah ngandamnak zung nih thawngthanhnak a tuah.
About The Author
