CYO North America Mino Nih Chin Zatlangbu, Media, Siangngakchia Tonnak An Ngei
The Chinland Post| 2018 June 12| Chin Center for Peace & Reconciliation (CCPR) tawlrelnak in Chin Youth Organization of North America (CYONA) nih Hakha um Media, Boarding School le Zatlang bu pawl tonnak an ngeih hna tiah theih a si.
CCPR tawlrelpiaknak in June 1 zan ah Mettamon Boarding school, June 2 ah Newlight Boarding, June 3 ah Sanpaih Boarding School ah siseh, Chin Media pawl he The Chinland Post@Fidi Foundation zung ah 28 May 2018 ah siseh, June 4 ah Hakha College he siseh, June 6 ah Hakha um Chin Christian Univeristy (CCU) he siseh, , June 7 ah Thantlang Siangsangrun No.1, No.2 he siseh, Thantlang Youth Association he siseh, CNF Thantlang Liaison Zung he le, June 9, 2018 CHRO zungah Hakha um Chin Mino, Hakha College, GTI, Hakha College le Baibal sianginn kai pawl he tonnak an ngei kho.
Media he itonnak ah rinhchantlak media si a biapitnak siseh, Boarding school le siangngakchia pawl he ton lio ah Salai Van Neih Bik nih zeizong te ah fimcawn a biapitnak (education is the key), fimcawn tikah duhnak taktak ngeih abiapitnak, lungsaunak le tuar khawhnak ngeih a biapitnak siseh, Salai Joseph Biak Cin Thang nih Sianginn kai lio ah nu le pa, Siangcachimtu saya/mah te upat abiapitnak, Pathian timhlamhpiakmi ning um a biapitnak, zeizong te hi thiltha in ruatthiam abiapitnak siseh, Salai Van Lal Lian nih Fimthiamnak cu dongcat lo (limitless) in mah le mah izuam a herhnak, fimthiamnak hi aho paoh pek in pawcawm kawl itimnak, ngeihmi thiamnak hmanthiam abiapitnak le Mai Meriam Sui Tin Tial nih mah le mah zumhngamhnak ngeih in hmailei mah le thiammi thimthiam le hmanthiam a biapinak pawl chimphuannak an ngei.
Hi cawlcanghnak kong he pehtlai in ” Hi cawlcanghnak hi CCPR nih mizapi pehtlaih in hmailei Chin ram thancho sernak (Community Engagement) in kan tuahmi a si. Ramchung ramleng um Chin mino pawl hi hmailei hinak kan ipehtlaih chin lengmang te lai. Ramleng zong nih ramchung sining kan theih hna i Ramchung lei zong nih hmailei zeitin dah rian kan tuanti khawh lai timi ngalh khawhnak caah kan tuahmi a si. Caan pe tu bu le CYONA cungah lunglawmhnak tampi kan ngei. Ramchung ramleng pehtlaihnak ah tampi a kan bawmh lai” tiah CCPR Admin & Finance Director Salai Bawi Uk Thang nih The Chinland Post ah a chim.
CYONA lei in US ah university kai lio Chin miphun thanchonak le hmailei riantuantinak kong he pehtlai in internship an rak thlahmi hna Salai Van Neih Bik_ CCU interned cachimtu (M.Div Ohio State, US), Salai Van Lal Lian_CCPR interned ( Bachelor of Architect, Kansas University, Kansas_ USA), Salai Joseph Biak Cin Thang_CCU interned cachim ( Bachelor of Business Administration, University of Buffalo, New York, USA) le Meriam Sui Tin Tial_CHRO interned (Bachelor of Political Science, Texas, USA) hna in an si. CYONA cu US um Chinmi zatlang ithithruainak ah a nganbik a si i US State hmun 25 lengah rian a tuan cuahmahmi a si.
CCPR cu Yangon hrambunh in June 7, 2016 in thok a si i Remhdaihnak (Peace Support), Daihnak he a pehtlaihmi Cauk le Hlathlainak (Peace Research & Publication), Zatlang le Mipi Pehtlaih in Ruahning Thanchonak (Community Engagement) le Mibu thanchonak (Social Development) a tuah cuahmahmi bu a si tiah theih a si.
About The Author
