Donald Trump Nih US Tlawng Dingin Kim Jong Un A Sawm
Salai Aung Aung| 2018 June 13| North Korea hruaitu Kim Jong Un cu US President Donald Trump nih US tlawn ding a sawm i Kim zong nih a cohlan tiah North Korea thawngthanhca nih an tial.
Singapore ram i tonnak an ngeih lio ah Trump nih Kim cu US tlawn a sawm i Kim zong nih North Korea khuahlipi Pyongyang ah tlawn ding a sawm ve ti a si. Kim sawmnak cu Trump zong nih a cohlan tiah theih a si.
Trump a tanhtu pawl nih cun hihi ram khat le ram khat pehtlaihnak ah Trump nih a thil tuah mi an cohlan ngai. Hi tonnak hi remdaihnak cahmai thar kau a si tiah South Korea nih an chim nain an ram ah US he raltuk cawn tinak an tuahmi ngol ding in Trump nih a thanhmi cung bel ah kan khuaruah a har ko tiah an chim.
Hi raltuknak ngol ding hi North Korea nih a halmi lakah a biapi bik pakhat a si ve. Tuluk nih cun hi tonnak hi North Korea cungah a lamkip in phihkharnak tuahmi pawl hun thannak caah a hram a si tiah an chim.
Nuclear hriamnam hrawhnak ding cahren min an thutmi hi hmaikhat le cheu tluk a si i North Korea nih Nuclear hriamnam an hrawh ahcun an ram humhimnak caah US nih tuanvo ka lak lai tiah US nih bia a tiam.
Asinain an minthut mi cahren ahhin an biakammi pawl hi zeitindah a phihma chuak lak kan tuanchuah ning a si lai timi bel aa tel chih lo ti a si. Korea University pakhat ah ramkhel lei hlathlainak a tuahtu Mr. Robert nih cun Trump le Kim nih min a thutmi hnatlaknak hi 1993 ah US le North Korea nih an rak tuah balmi he khan aa khat ko tiah a chim. A ralaimi zarh chung ah US le North Korea ton biaruahnak a um than lai.
Ref: BBC Burmese
About The Author
