Egypt Nih Anmahte In Goal An I Sut; Egypt An Tla I Russia An Kai Cang

City Hunter| 2018 June 20| 2018 kum World Cup ah Group A in Russia le Egypt cu June 20 deilei suimilam 12:30 ah an chuih i Russia nih 3-1 an tei hna. Cucaah Russia cu group in an awng cang i round 16 (phu 16- sungh/tlak) chuih kho ding in an lut cang. Cu bantuk in Egypt cu group in an tla ve cang. A tanglei ah Russia le Egypt goal an i sutnak (high-light) minute 2 chung video tawite zoh chih khawh a si.

June 20 deilei ah Russia nih Egypt cu 3-1 in an tei hna. Dinhcaan hnu minute 47 ah Egypt hnukhamtu Ahmed Fathi nih pumpululh ka kham a tinak ah anmah goal chung ah lutlaak in a kham sual caah anmah le anmah le an goal. Minute 59 ah Russia hmaikal Denis Cheryshev nih goal 1 a sut. Minute 62 ah Russia hmaikal Artem Dzyuba nih goal 1 a sut ve than. Minute 73 ah Egypt lei nih penalty an ngah i Mohamed Salah nih a sut i a goal.

Group A ahhin Russia, Uruguay, Saudi Arabia le Egypt an si. Russia hi June 25 zan suimilam 8:30 ah Uruguay he puai khat an chuih rih lai. Sihmanhsehlaw, Russia cu puai hnih an chuih tiang ah mark 6 an hmuh cang caah group in an awng cang. Uruguay he an chuih tikah an i tluk ah siseh, an sungh zong ah siseh mark 6 in group an awn cang caah phu 16 sungh/tlak chuih kho ding in an kai cang.

Cu bantuk in Egypt hi June 25 zan suimilam 8:30 ah Saudi Arabia he puai khat chuih ding an ngei rih ko nain an chuih ciami puaihnih an sungh cang caah mark khat hmanh an hmuh rih lo caah group in an tla cang. Saudi Arabia an tei hna zong ah group in an tla thiamthiam cang. Tukum world cup ah a hmasa bik a tlami pumpululh phu an si.

Saudi Arabia hi June 20 zan suimilam 9:30 ah Uruguay he an chuih lai i Uruguay nih an tei hna ahcun group in an tla ve thiamthiam cang lai i Group A in Russia le Uruguay an kai lai. Amah belte Saudi Arabia nih an tei hna sual ahcun caantha an ngei kho rih.

Tukum 2018 World Cup a chuihmi zapi phu 32 an si i group 8 ah then an si. Group pakhat ah phu li cio an um i puai thum cio an chuih lai. Mark sang bik phu hnih kha group in an kai lai i a niam bik phu hnih kha group in an tla ve lai.

Group A in Russia le Uruguay hi an kai lai i Egypt le Saudi Arabia hi an tla lai tiah pumpululh thapetu tampi nih an ruahdamh cio hna.

Tuzan chuih dingmi puai

  • June 20 zan suimilam 6:30 ah Portugal le Morocco
  • June 20 zan suimilam 9:30 ah Uruguay le Saudi Arabia
  • June 21 deilei suimilam 12:30 ah Iran le Spain

Morocco hi puai hnih chuih ding an ngei rih nain tuzan an sungh ahcun group in an tla ve cang lai.

Na ruahning rak langhter ve.. (Leave a comment)

%d bloggers like this: