American Nih UN Human Rights Council An Chuahtak
City Hunter| 2018 June 20| American nih UN Human Rights Council in kan chuak tiah an thanhchuah. Mexico ramri in a rak lutmi ralzaam khuasami ngakchia hna hringtu nu le pa he a thencheutu American President Trump policy fakpi in an soisel lio caan ah atu bantuk in a thanhchuah hi a si.
“UN Human Rights Council hi nuhrin covo buartu pawl runvenak a peknak hna a sau cang bantuk in ramkhel tanhhlei ngeihnak he aa cawhmi phu a si caah kan chuak” tiah UN kongkau American palai Nikki Haley nih a chim.
American nih a halmi thlenremhnak pawl rianrangte in tuanchuahnak a kan tuahpiak lomi hi ngaihchiat awk taktak a si bantuk in nuhrin covo a buartu pawl council ah hmunhma peknak hna a um.
Nuhrin covo buartu pawl runvennak a pek hna tiah American nih sual a puhmi chung ah ‘Venezuela le Iran nih namnehnak pawl, nuhrin covo buarnak pawl sawhkhih soiselnak a um lo pin ah Democratic Republic of the Congo pi zong chungtel thar ah an cohlan’ tiah a langhter chih.
Cu pin ah tukum ah siseh, a luancia caan chung vialte ah siseh Israel ram cung ah biakhiahnak pa 5 a tuahmi hi dikfel- tlukruannak a um lo kong siseh, cunak in nuhrin covo a buar deuhmi North Korea, Iran le Syria ramthum cung i biakhiahnak a tuahmi nakin a tamdeuh kong zong a chimchih.
“Cu ruang ah cu hlan i nuhrin covo council cung ah upat tihzahnak lungput ka ngei nain atu cu ka upatnak vialte a tlau dih cang” tiah United States Secretary of State Mike Pompeo nih a chim.
UN Secretary General Antonio Guterres i chimnak nawlngeitu nihcun UN Human Rights Council in American an chuahlo ding ka duh. Vawleicung ramkip nuhrin covo pawl runven zohkhenhnak a pek bantuk in cawisannak lei zong ah council hi a biapimi suttung ah aa tel peng rih ko tiah a chim.
UN Human Rights Commissioner Zeid Ra’ad Al Hussein nih American UN Nuhrin Covo Council in an chuahmi hi ka lungrawh tuk bantuk in hihi khuaruahhar awk a tlakmi thawngpang a si lo tiah a chim.
Nuhrin Covo ngiathlaitu phu nih UN Human Rights Council in ka chuak a titu American biakkhiahmi cu an mawhchiat i President Trump i nuhrin covo kongkau policy pawl hi an bi tuk tiah a chimphuan.
New York in BBC thawnglatu Nada Tawfik nih Trump cozah nih a lam phunkip aa telmi policy hi a donghnak bik a almi pakhat a si i vawleicung ramkip nih nuhrin covo runven cawisannak caah American hi American ngaitthlaimi cheukhat kongkau hi tawlrel aa harh cang lai tiah an ruahdamh.
American hi nuhrin covo council he pehtlai in a zungzal buainak (conflict) a ngei theu tawn. 2006 kum hi phu an rak dirh lio in American President Bush cozah nih hi council cu an rak dohkalh. 2009 kum President Obama cozah chan ah hi council chung ah an rak i tel than.
Switzerland ram Geneva hrambunh UN Human Rights Council cu 2006 kum ah rak dirh a si i nuhrin covo kongkau he pehtlai in biahal awk a simi ram hna kha chungtel (member) i a cohlan hna ruang ah hi council cu soisel a tong.
Ref: BBC Burmese
About The Author
