Ekah 676 Chung Innsakmi Mahte In A Thetmi Lawng Innhmun Ruahpiak A Si Lai; Vuanci Soe Htet
The Chinland Post| 2019 August 19| Mah lungtho tein inn ka hrawh lai/ka theh lai a timi lawng hmunhma kan pek hna lai.
Inn ngeilo sifak caah kan ruahmi a si i minung 30 chungah Minung 8 lawng nih kan hrawh lai an ti caah atangmi minung 22 cu zeihmanh ruahpiak a si lai lo. Hrawh a si ko lai. Hi Hakhathar kan samhmi hi Cozah nih ningcang tein committee kan ser i kan tuahmi kumkhat leng arau cangmi a si.
Thisen Luannak le buaibainak a chuah sual ah timi biahalnak ah Vuanci Soe Thet nih, “Cozah lei in kut kan thla hmasa lai lo. Cu bantuk buainak zong a chuak lai ti kan ruat lo. Thisen tiang a luang lai timi bia hna an chim cu an chimh le cangka bak in thongtlak khawh a si. Asinain cu bantuk cu tuah colh kan tim lo. Cucaah pakhat khat a si sual ahcun upadi ning tein riantuan le tazacuai an si ko lai” tiah a chim.
Phungning lo in inn 135 a um tiah ruah a si nain Tazacuai ah an chuak lo tiah theih a si. Minung 30 chungah minung 22 nih inn kan thet kho lo an ti caah minung 8 lawng innhmun ruahpiak a si lai tiah theih a si.
Hakha Khuapi samhnak ding Ekah 676 ahhin Ekah 372 chung innhmun 644 lawng samh a si rih i a tangmi 304 ekah hmun zong samh than a site lai tiah theih a si.
About The Author
