England Prince Charles nih a Hlutmi Ks. Sing 1,700 Leng Man Sii cu Chin Ram A Phan Cang

England siangpahrangnu Elizabeth II i a fapa Prince Charles nih a hlutmi US$119,121.68 (Kawlram phaisa ting 1,780 leng) man sii le sii thilri pawl cu Matupi peng Lailenpi khua ah December thla dongh khan a phan cang tiah theih asi.

Prince Charles (Prince of Wales) nih a dirhmi ‘International Health Partners UK’ nih Dr Sa Sa dirhmi Health and Hope Myanmar sinah a hlutmi asi. Health and Hope Myanmar nih a rianṭuan pawl an umnak hmun pawl ah a phawt hna lai. Health and Hope Myanmar cu Mindat, Matupi, Sami, Thantlang, Hakha le Paletwa peng, le Rakhine state cheukhat ah rian an ṭuan.

Helth and Hope Myanmar i program director Dr Bei Cho Tha nih, “tu thla thok in kan group ngandamnak rianṭuan pawl an umnak khuate pawl ah kan phawt thluahmah hna lai,” tiah a chim.

“Kan phawt khawh lonak khuate pawl cu March thla ah ngandamnak tinṭan a um i an dihlak an ra te lai i kan pek te hna lai. Matupi Sizung, Hakha Sizung le Lailenpi Clinic zongah sii kan hlut lai. Rakhine state cu a him lo caah luh khawh si lo i kan hlu kho lai lo. Prince Charles nih a kan hlutmi sii tam deuh cu si-ai an si hna, dinmi sii deuh kan ti lai cu,” tiah a chim.

2007 ah Matupi peng Lailenpi khua le pawngkam khuate pawl ah zuu nih tlanglo facang an rak hrawh dih ruangah mipi ei awk ngei lo le vitamin bau in an rak um lio ah Dr Sa Sa nih International Health Partners UK sinah bawmh a rak hal i atutiang Prince Charles he pehtlaihnak an ngei — November thla zongah Prince Charles he tonbiaruahnak an ngei.

Prince Charles nih a dirhmi International Health Partners UK nih Health and Hope Myanmar sinah atu bantukin sii a hlut hi voi 7 asi cang. Prince Charles, kum 71 cu atu lio England Siangpahrangnu Elizabeth II, kum 93 i a fa upa bik asi caah a nu Elizabeth II ṭhutden a co te ding, England Siangpahrang (King of England) a ṭuan te ding a si. Ref; Zalen +++