Esther Dawt Chin Sung Singapore Ah Tuah Dingmi CND Ah Hla A Sa Lai
Tawk Tling Thang| 2019 February 11| A ralaimi February 17, Singapore ah Chin Christian Fellowship tawlrelnak in tuahdingmi Chin Miphun Ni (Chin National Day_CND) ah hlasa ding in Chin Idol winner a simi Esther Dawt Chin Sung an sawm tiah kan theih.
Hi kong he pehtlai in Esther Dawt Chin Sung cu The Chinland Post nih pehtlaihnak kan tuah i atu bantuk in a kan leh.
“Singapore um kan Laimi nih Chin Miphun Ni ah hlasaknak he caanhmang ding in a kan sawm. Kal ding zong kaa timcia cang. Atu hi Yangon ah ka um. Chin Miphun Ni hi February 17 ah tuah an timh caah February 13 khi ka kal lai. Kanmah Lai lei ahcun keimah lawng a kan sawm. Midang an sawmmi cu um dawh a si ko nain mi zei an sawm hna ka hnga lo”.
Chin Christian Fellowship tawlrelnak in February 17, Singapore ah Chin Miphun Ni an tuah lai. Hi ni hlasatu ding ah Esther Dawt Chin Sung, Benjamin Zahau le J. Malsawmtluanga an sawm hna tiah kan theih.
Hi ni ah hlasaknak lawng si lo in Chin thilthuam hmuhsaknak, Chin nunphung laam hmuhsaknak, chanthar lam a phunphun hmuhsaknak pawl he sunglawi tak in caanhman an i tim tiah CCF hruaitu upa hna sin in kan theih.
Esther Dawt Chin Sung hi Chin Idol hlasak zuamnak ah pakhatnak (winner) a cotu a si. Amah hi Hakha a si. Pu Albert Chan Cung Hnin le Sayamah Par Ki fanu a si. 1998 February 20 ah a chuak. Economic Major, Yangon University ah a kai.
Esther hi Chin Digest he biaruahnak ah, “Hlasak hi Pathian nih a ka pekmi pahrang a si caah ka pawcawmnak tiang a si kho lai ti ka zum” tiah a chimphuan.
About The Author
