Faphir Pathum Hna Cu Luhmuh-vuanthan Zung Nih Sing 5 Bawmhnak A Pek Hna Lai

Salai Elvis|2020 March 6| March 5 Hakha sii-inn pi ah Faphir pathum hrin mi hna cu ramkulh Lu-hmuh-vuanthan zung lei nih Faphir pathum caah Ks.500,000 bawmhnak pekding in timhtuahnak an ngei tiah kan theih.

Hi kong he pehtlai in Social Minister Pau Lun Min Thang nih “Lu-hmuh-vuanthan (လူမူဝန်ထမ်:)zung lei nih Faphir pathum caah sing 5  a dang tein bawmhnak pek an si ko lai. Chin ramkulh cozah min in cun a si lem lo a dang te a si ve ko. Sii inn an chuah hlan ah bawmhnak cu pek kan duh hna nain tangka a tla rih lo, a si nain kan mah nih kan chuah piak chung ko hna lai. Atu bantuk faphir bawmhnak hi pahnih aa phir mi cu bawmh an si lo i pathum cung lawng bawmhnak pek an si.”tiah TCP ah a chim.

Minister Pau Lun Min Thang

“Faphir pathum hrin timi cu a um tuk lo i a har ngaingai mi a si duhning in tuah khawh mi zong a si lo. Chin ram chungah cun Pahnih phir hi an tampah, a buaktlak in cun pakhat deuh hi a si ko. An nu le an pa sin ah biacah ka duh mi cu voi khat ngeih ah pathum ngeih khawh cu an van tha tuk, cun Chin Miphun kan min zong hngal awk tlak taktak a si kan lawmhpi tuk hna. A nu le pa hna zong nih hi ngakchia tete pathum hna cu kum 2 tang an si lio tein ah an pumsa nih a herhmi Vitamin an chanbau ter hna lo ding kha a biapi tuk. Cun kum 3-8 kar lak fimthimnak an cawnnak kongah biatak tein an zohkhenh hna a hau.”tiah vuanci Pau Lun Min Thang nih a chimchap.

Dr.Sasa

A tubantuk in Pathum phir in a chuak mi hi Chin ramchung ah a um lo ti tluk  in an tlawm. Hakha um Leitak khuami Pi Zai Par le Pu Sui Er nih hrinmi faphir pathum hna cu Upabik nu min ah Martha, a changdeuh Nu ah Marry le a hniang bik Pa min Lazaru tiin  Dr. Sa Sa nih an pathum ningin min aa sak hna tiah kan theih.

 

Na ruahning rak langhter ve.. (Leave a comment)

%d bloggers like this: