Gospel for Asia Football Club President Rev. Thawng Tha Thang NC @TT he tonbiaruahnak

Rev. NC Thawng Tha Thang @TT cu atulio GFA FC ah President a tuan cuahmah mi a si. Cu lawng si lo in National Believer Church pumpi ah General Secretary le Believers Church Theological Seminary ah Principal a tuan cuahmah liomi zong a si. Myanmar Theological Student Council ah President, Christian Champion League a rak tuah tawntu— Chin Christian Football Association President le Myanmar Evangelical Christian Alliance ah EC chungtel (Literature Committee hruaitu), Myanmar Christian Youth Fellowship ah Advisor a rak tuan balmi a si. Lai Chiatthat Bu zong ah EC chungtel a si.

 

CD: GFA Football Club nan rak thawkning le MNL ah nan rak luhning a tawinak in na kan chim kho hnga maw?
TT: Kannih hi Bible sianginn a dirhmi kan si. kan Ministry pi i Icon pakhat simi cu Bible sianginn hi a si. Hi kan sianginn hin 1000 leng nih degree an lak cang. Bible sianginn a rak kai mi cu mino deuh an si tikah pumpululh chuih lei hi an rak huam ngia. Cunယ kannih hi Kawlvai lak a um mi kan si caah kan pawngkam hi ven ngai a hau. Sianginn kan rak dirhka 1992 hrawng hna ah cun kan kiangkap ah Chin mi le khrihfa hi kan tlawmte i pawngkam, sang le veng he i theihhngalhnak ah pupmpululh chuih zuamnak puai hna kan rak tuahpi hna. Tik ah, sang nih an rak kan dawt ngai i minung 200 leng ca ah Eh-Sa-Zin va tuah hau lo in kan rak um kho— nihin tiang. Cun kan sang nih peng pumpi zuamnak ah chuih ding in bawmh an rak kan fial. North Dagon peng nih pakhatnak an ngah a voi khatnak hi kanmah sianginn kan rak chuihpiaknak hna thawng in a si. Cu tik ah zei-dah kan hlawk ti ah cun atu i kan sak mi inn vialte hi saknak nawl va hal len a um lo, a olnak cun cu pumpululh thawng cun sang le veng, peng he kan i dawhria, kan ti lai cu.

Cun, Chin ramkulh aiawh in kan chuihpiak u tiah an kan sawm than i mino he upa team he kan chuihpiak hna i semi final tiang hna phan ding in kan rak chuihpiak hna. Tik ah, mino nih le an huam, bawmtu le thazang petu an tam tik ah 2006 kum ah immature zuamnak (MNL 3 bantuk) ah kan lut lai kan ti. Keimah zong cu bible siangngakchia hawikomhnak bu ah hruai-tu ka rak si i a kenkip i a thiam mi kha kan rak sawm hna. Kan rak that ngai ca ah Lai pawl an thawng ngai ti a rak si. Mah in khan, 2009 ah MFF hruaitu U Zaw Zaw nih ka pa kha a rak auh. Zei si poh ah Myanmar National League thawk kan duh ca ah Chin aiawh in kan luhpiak u, mi dang vialte zong ka sawm cang hna, tiah a ti. Ka pa he kan i ruah i kan lut rih lai lo tiah ka ti. Luh i a rauh lo hlan i thangchiat kha miphun ca zong ah a tha lo. Lut hna sehlaw kan ngiat ta hna lai tiah kan ti. Anmah nih cun lut ulaw company dangdang he zong kan in pehtlaihpiak hna lai tiah an ti ko nain thil fiang a si rih lo ca ah MNL 2 ah kan chuih lai i kai le tum a um tik ah kai khawh kan rak i zuam te lai kan rak ti. Cu lio cun Chin United nih register an rak tuah ve i an lut ve. Kan hun chuih i MNL 1 ah kan kai, kannih kan kai hrawng kha kan hngah mi dirhmun a fian bak a si. Ziah ti cun, kannih a tang i kan rak um lio kha tangka duh zatzat in an rak hman lio— puai khat tei ah mawtaw pakhat hna an rak i pek lio kha a si. MNL 1 ah kan kai bak ve khan cozah a hun i thlen bak a si ve tik ah an tangka kha an hman khawh ti lo tik ah an hman mi, lahkhah tbk kha an zorter he aa ton bak kha a si i, kan i kaihkawh ngai.

CD: Chin ramkulh aiawh hna in Kawlram pumpulh zuamnak ah GFA youth club khi an i tel tawn ti kan theih i, zeitik kum pawl voi zeizah dah nan i tel bal cang. Zeitin dah Chin ramkulh nan aiawh khawh ning na kan chim kho hnga maw?
TT: Buchoh Hung Ngai chan lio ah khan a si. Anmah zangleknak zung nih bawmh an rak kan hal ca ah kan rak chuihnak kha a si. Upa hi voi khat kan va chuih i kan tla colh. Kan hnulei kum deuh khan Nay Pyi Taw ah kan va chuih than i Tuarter tiang kan kai. Khakha chan hnu lei deuh ah Chin ramkulh nih sang deuhte kan hun kai khawh a si. Youth Club tu hi cu voi thum, li cu kan va chuihpiak pah lengmang ko hna.

CD: Atulio GFA Club nan dirhmun kan chim ta law?

TT: National League Club pakhat si nakding ah hin tahfung an chiah mi a um. Upa (Senior) team pakhat an ngei lai, Club pakhat a ngei lai, a thi-am mi (Professional) youth club pahnih a ngei lai— kum 21 tang le 19 tang tiin. Kan duhning cun Laimi hi Senior team ah chuih dih hna seh ti kan duh. Nain cucu kan phan kho deuh rih lo. Cu tik ah kum 19 tang le 21 tang kha a that tuk lo ding a si zong ah Laimi kan hman hna lai i cu pawl cu kum khat tete in Senior ah an kai te lai ti hi kan i timh ning a si. Atu hi Senior Team ah Laimi pa ruk hrawng an um. Nikum Junior chuih mi kha pali kan kaiter hna. Hmaikum zong ah kaiter ding kan ngeih hna. Team khat ah hin 25-30 karlak minung cazin pek ding, ti a si.

CD: Pathian riantuan tiah mi tampi nih theih mi nan si i zeiruang ah dah Football Club cu nan tuah ti mi hi na hun kan fianh kho hnga maw?
TT: Si, biaknak lei nih hihi tuah ding a si maw ti hi an ka hal tawn. Ka leh mi hna cu thil tha a si mi, ram le miphun ca a tha mi thil a si mi cu tuah ding a si ko ti hi a si. Atu ah hin tuah hlah sihlaw ho nih dah Chin ramkulh aiawh in a tuah lai? Tangka thazang tam tukte a dih, cu nakin hi vialte a kal khawh nakding ah tawlrel le tlaih kha a har tuk rih mi a si. Pumpululh cu long term a si bu in short term zong a si. caan khat (Season) pakhat ah kum khat duahmah in a si tik ah kha kum khat chung i tawlrel le kalpi kha thil harsa taktak a si. Kha vialte a tuahtu an rak um hlan chung i kan tuah mi hi ramkulh aiawh le miphun aiawh ah thil tha ngai kan tuah a si tiah ka ruah.

Cun an ruah sual lo ding ah ka duh mi cu biak-nak tangka an hman tiah an ruah sual lai ding hi a si. Hi pumpululh zuamnak ca ah hin biaknak phaisa fang khat hmanh aa tel lo. Biakinn phaisa, mission phaisa aa tel kho lo. Pumpululh Club kan tuah lai kan ti cangka te hin phaisa hram bunh mi (capital amount) kan ngei lai kan ti. Cucu kan lehthal lai i a miak chuak mi in kan kalpi lai kan rak ti. Cucaah lahkhah sang pipi zong in kan pe hna lo. A thiam mi (Professional) lawngte an si ko ca ah cu zat lawng kan in pek khawh lai tiah kan ti hna i,
zeitik hmanh ah kan biakam kan pelh ve lo.

Cun, atu hna ah Chin United nih an kan maak tak tik ah hin maak hna kan duh ngai ve nain aa aho tuah ding an um rih lo cun i hne deuh ko rih usih ti kha kan thinlung ah a um. Ziah tiah— Ram pumpi ah ramkulh le ramthen dang nih ramkulh, ramthen hmanthlak in an i ngeih cio ca ah kannih Chin ramkulh zong nih ram pumpi hmai ah ramkulh hmanthlak ngei ve usih. Cucu kan upate ca zong ah mithmai ngeihnak si ve lai, tahfung tlinnak pakhat si ve lai tiah kan i hnek hramhramnak a si. Pum-pululh lawng hi a si lo, a harsa mi siangngakchia pawl bawmhnak kan tuah mi hi pumpululh nak a let tamtuk in kan tuan mi a si.

CD: Kum khat i nan tangka dih mi le chuih-tu lahkhah nan i pekning hi buaktlak in na kan chim kho hnga maw?
TT: Club pakhat kan dirh tik ah anmah MFF (Myanmar Football Federation) nih tahfung an ser mi a um. Pumpululh chuihtu pakhat hi a tlawm bik sing hnih in sing hra karlak a pek lai ti a si. Ziah ti cun a hlan ah khan hi bantuk rikhiah in an rak tuah lo tik ah tei duh tuknak lung in lahkhah sangpipi an rak i pe i, a hnu ah Club zong dirh kho lo tiang in an rak um dih. Cucaah lahkhah rikhiah tuah usih tiah an ti. Cucaah kannih bantuk Club hi kan tha a dam. Kannih cu a tam deuh cu Sing hnih le sing thum deuh hi kan pek hna. Coach hi a pariat an um, Manager te a um, CEO a um i zunglei tawlreltu an zapi 12 tluk an si i. Kum khat ah hin sing thong hnih in sing thonog hnih le za nga karlak hrawng kan dih. Kha ah khan anmah MFF nihhin sing thong khat tluk an kan bawmh. Sing thong khat le za nga tiang hna bawmh an kan timh tawn nain atutiang ah cun kan hnu lei kum kha thong khat an kan bawmh i nikum khan sing za thum lawng an kan bawmh. Tukum khan MPT he hnatlaknak an ngei kho i sing za ruk ah an kai than. Zei a si poh ah khakha cu rampi chawlehthalnak cung ah aa hngat mi si ve i hmailei cun sing thong khat tluk hrawng hi cu a si kho te ko lai. Cun, atu hi Singapore i media channel pakhat nih hi ka i Live Stream poh hi 7 million in cawk an kan timh i, hi bantuk tete in MFF hi bawmtu le tuan hawi a ngeih deuhdeuh cun amah le amah in aa tangdoh te ko lai ti kan zumh.

CD: Laimi chung in pumpululh chuih thiam kan tampi ve ko bu ah zeiruang ah dah nan first line up ah khin si seh nan team ah si seh, Laimi kan hmuh huaha hna lo?
TT: Line up hmuh ding hi kan duhpiak taktak mi hna le kan i timh mi cu a si ko. Nain a hmu kho peng mi hi cu pahnih lawng khi an si rih. Cun, Junior in a rak kai mi hi Laimi pahnih an um i second season hna khin line up ah an i tel kho te hnga dek maw. Kanmah lei nih cun Lai Club a si bantuk in Laimi hi line up ah i tel kho
peng hna seh ti cu kan duh i Coach te zong an i zuam cuahmah ko i an i tel thluahmah te ko lai kan zumh. Cun, kanmah Laimi chung in a thi-amthiam Yadanabon, Yangon tbk. ah an um. Nain kanmah nak tha deuh in an pek khawh hna ca ah cu zong cu kan Laimi ca ah thil tha a si kan ti ko ca ah kan au lem hna lo. Amahbel khika lei ah line up hna an i tel khawh lo cun keimah zong nih ka auh tawn ko hna. Chikkhat lo piin thil cu a si khawh lo ca ah duhsah in a tha ziahmah lai kan zumh ko.

CD: Chin mi nih ngeih mi chung in nanmah lawng nan taan cang tik ah atulio nan dir-hmun le hmailei nan i tinh mi na kan chim kho hnga maw?
TT: Aw si, kanmah hi GFA tiin pumpululh lei kan rak thawka te khan kan dir. Atu Chin Unit-ed hna a um lo tik ah mi tampi zong nih Chin min in dir lawlaw ulaw a kan ti mi an tam ngai. Kanmah zong meeting voi hnih thum kan to cang. Hmailei pi tiang kan kal khawh ding a si ko cun Chinland FC maw kan si te lai, ZaLat-May FC, Taungzalat FC hna dah kan si te lai tiah biatak tein kan i caih cuahmah lio a si ve. Cun, pahnihnak ah, Club pakhat kan dir tik ah hin hi Club hi ni nikhat ah cun Chin mi dihlak i tel kho te hna seh ti kan duh ngaingai. Atu zong kan Vice President hi Dr. Sui Hingz a si. I, kha banatuk in Chin mi rian ngan ngei tampi nih kan dirpi ve hna sehlaw khakhan Chin mi ta taktak bantuk khan tuanti kho hna sihlaw ti khi ka duh ngai, Club ngeitu a um ko zong ah.

Cun ram dang ka va kal zong ah pumpululh kong he aa pehtlai mi tete ka va zoh tawn. Nai Korea kan kal lebang cu kum 21 tang World Cup chuihnak zong kha ka va zoh. Annih cu ramkulh bak nih pumpululh Club pakhat a ngeih i ramkulh chung um rian ngan ngei pawl kha tel lo ngah lo bak in an telter hna, an hlutter cio hna. Cu bang hna ka va hmuh tik ah thazang ka ngah ngai. Ni nikhat ah Chin ramkulh hna nih cu bantuk ngei ve te sihlaw tuanti kho viar te hna sihlaw ti tiang hna khi saduhthahnak kan ngei.

Cun Chin ramkulh ah mah hmunhma certual ngeih ding hi kan ruat ngaingai. Cu ngeih khawh nakding ah a biapi cem mi cu vanlawng a tum hau. Tu hi vanlawng tumnak zong kan ngei lai ti a si cang. Mah hmunhma certual ngei ciocio hmanh ah hin mawtaw bak in olzang tein phanh khawhnak sisehlaw aa hlawk cem ding khi a si. Ziah ti cun, khika i an rak umnak vialte kha kanmah nih pek ding a si. I, vanlawng hna in an rat cun tlunkalnak ah a dih tuk tiah an phunzai kho. Cucacun mawtaw hi aa hlawk cemnak cu a si. Vanlawng ti zong cun zarh khat ah voi khat hnih lawng hna a tum mi a si cun a ngah bak lo mi a si: D

CD: Chin ramkulh cozah he tah pehtlaihnak le i chimhchawnhnak nan ngei el maw?
TT: Atutiang cu kan ngei rih lo. Chin ramkulh kan upate an rat tik zong ah pumpululh chuih zoh ve ding in kan sawm te hna lai tiah tim-hnak cu kan ngei. Kanmah zong cu Club saupi dir cang mi kan si nain anmah lei in theihpinak le biaruahnak tbk ah sawm kan tong theng ve lo. Anmah zong cu cozah thar an si ve tik ah an mawh ve rih lo. Miphun aiawh in a dir mi Club kan si ve tik ah zei si zong ah cozah nih hin cun an kan bawmh lo hmanh ah theihpinak te hi cu um kho sehlaw ti ka duh ngai.

CD: Chin ramkulh aiawh in a dir mi Club nan si tik ah Chin ramkulh pumpululh lei thancho khawh deuh nakding ca ah Chin ramkulh cozah he nan tuanti khawh ding mi lam a um maw?
TT: Chin aiawh in a dir mi Club kan si tik ah Chin ramkulh cozah nih an kan bawmh khawhnak lam tampi a um. Biana ah, training tuah nakding ca ah hmunhma, mah hmunhma certual ca ah hmunhma tbk zong hi anmah kut ah a um mi a si. Cucun rak tlung ulaw Chin ramkulh pumpululh lei thancho nakding ca ah tiah pumpululh chuih zuamnak puai zong a tua-hti kho kan si. Ramkulh zaanglek zung i an budget chung in pumpululh chuih lei cawnnak (academy) kha kanmah he i bawm in hun sihlaw kannih nih chimhcawnpiaknak lei in kan bawmh hna lai i annih nih minung kawl le tawlrel kha tuanvo an lak lai. Cun, Chin ramkulh hmunkip i a um mi sianginn tete ah zaanglek he aa pehtlai mi kan tuahti khawh ding mi tete a um lai ka zumh. Chin ramkulh chung i a um mi rian lian ngei pawl (Chin ramkulh cozah nih rian a pek ding a hmu mi Company pawl) he khin zei si poh ah annih hi Chin ramkulh aiawh in a dir mi an si ca ah tiah theihternak tuah, hawikomhnak tbk tete kan tuahpi hna sehlaw kan Club pawl zong hi tampi hmai ah a fong kho hnga.

CD: A hlan ah Chin United kha Chin mi za-pi nih tha rak pek taktak a si. Nain atu ah an ngol cang i nanmah lawng nan tang cang. Tik ah, Chin mizapi nih thazang pek khawh nakding ah zeitin hmalak nan i timh mi a um maw? Eg. Mawtaw in mi don, angki chuah, media lei tbk.
TT: Si, kan i tim. A pakhatnak ah Media lei hi biatak tein kalpi kan i tim. GFA FC facebook page zong kan ngei. Cu kan page cu media le Club dangdang nih an zoh awk ding a si tik ah Kawl ca hman a si. Tik ah, Lai Version (Laica hman mi) in ngei kho ve sihlaw ti kan duh. Kha ah khan Lai mi a chuihtu pawl kha an konglam tawi tbk kha anmah le holh cio in video thlak i tar, tbk hi biatak te kalpi kan i tim.

Cun, Chin ramkulh cozah he i chawnbia in pumpululh chuih zuamnak puai tuah te ding kan i tim. Hlanlio Pu Hung Ngai chan lio ah khan an kan sawm i Chief Minister Cup kha voi hnih kan tuahpiak bal hna. Atu zong hi kal than kan i tim. Kan Club zong mipiza he theihternak tuah, Tahan lei zong ah tuah ding kan i tim, tlangcung i um mi Aizawl FC he hna zong peht-laihnak kan ngei.

CD: Nan pumpululh chuihtu nan hruaining hna theih kan duh ko— A leng ah si seh, nan chiahnak hna inn ah si seh, training tuahnak le dressing room te hna i nan i hruaining.
TT: Kanmah nih umnak inn le hmun, Bus kan ngei. Khi nih khin tlawmte cu a tloter deuh ngai. Training tu cu mi dang certual ah hlang in kan tuah.

CD: Nikum ah khan pakhatnak lak cu kan i tim lo, a tang i kan tlak lo poh kha pakhatnak ngah bantuk ah kan i ruah ko lai tiah na rak chim. Zeiruang ah dah cu tluk niam cu nan rak i timh? Tukum tah kum dih tik ah zeizahnak hrawng um ah dah a za lai tiah na ruah?
TT: Aw, kan chim bang nam cu a chahnak nih a tan kho lo i a pannak lawng nih a tan khawh i kaupi tinh le chimrel si lo in a fianghlang mi te,
tuah khawh ding mi te in i tinh kha ka uar. Cucaah Kawl media pawl sin ah ti khan ka chim kha a si. Zeica tiah a hlan ah kan rak kai i kan chuih i kan tla than. Tik ah, kannih ca i pakhatnak ah kan i zuam ding mi cu tlak lo kha a si. Kan ca ah cun pakhatnak tluk a si. Cu ning te cun kan tuah khawh.

Tukum tu hi cu tlak lo si lo in cung deuh ah kai khawh ding kha kan i tim. Kanmah zong hmu-hton kan hun ngeih deuh cang tik ah tlawmte cu kan tha deuh ngaingai cang tiah kan i ruah. Kan minung a tha bak mi pahnih kha Club dang nih an kan cawk, anmah nih an pek ding mi zat kan pek khawh hna lo tik ah kan tlai kho hna lo. Khakha a poi deuh ngai mi cu a si.

CD: MNL ah Club zeimawzat cu an i ngol thluahmah. Hihi zeiruang bik ah dah a si?
TT: MFF nih hin subsidy ti mi Club pakhat ah cu zat bawmh ding ti mi a um. Atu i MPT he hnatlaknak (contracts sign) kan ngeih mi kha i then cio a si. A hmasat ah Club cio i then a si. MFF nih hin bawmtu le tuan hawi lian pipi a ngeih ah cun Club pawl hi kan zangdam deuh ngaingai ding khi a si. MFF hi ram pumpi mith-mai pakhat a si nain ka ruahningnak leng in a tha der deuh ngai. Cucu Club pawl an i ngolnak a ruang pakhat a si.

Cun, Kawl ram Club pawl hi i ngol a duh mi an tam tuk. Ai ngol mi hi pa nga tluk a si. A ruang bik cu MFF nih a bawmh mi a tlawm tuk— bawmtu le tuanpi hawi a ngeih mi a tlawm tik ah Club pawl sin i a hun thencheu mi kha a tlawm tuk i Club ca ah a rit ngaingai. Cun, mah hmunhma certual ngeih nakding ca ah mahle ramkulh le ramthen cio nih hmunhma an pe kho hna lo. Cu ruang bik ah Club pawl nih i dinh an duh cionak a si. Zeicatiah a miak le a hlawk pakhat hmanh a um loh cu mu. Tukum tu hi MPT le a dangdang bawmtu (Brand hme tete lawng an si) an um i kan i ning deuh vak. Cucaah MFF lei in bawmhnak a tam deuh si le Club pawl hi kan dirhmun a fek deuh ve ding khi a si. Kei ka duhning lebang cun MNL cu ram pumpi huap le mithmai a si caah bawmtu Company lianpipi (Toyota, Samsung tbk) tal khi cu ngei kho, kan lakpiak kho ve hna sehlaw aa dawhdang deuh hnga ka ti.

CD: Laimi hi pumpululh chuih lei ah zeitluk khan dah kan si tiah na ruah?
TT: Kanmah Laimi hi pumpululh chuih lei ah kan thangcho ngai. Biana ah Laimi chung in New Zealand ram mino thim mi (selected) ah aa tel mi pahnih an um. Cun, Australia mino ah aa tel mi zong an um. Anmah zong cu kanmah Club zoh ah an rak tlung, hmailei cun kan sin ah an chuih khawh ve (an kan bawmh) nakding ah lam kawl kan i tim. Anmah zong an thatho ngai. Kan sin ah hawikomhnak in kan chuihpi cang mi zong an um.

CD: Mino te na si rih i, thithruainak lei ah mi tampi nih zohchun tlak ah an in hmuh? tlamtling tein mizapi hruai khawh nakding ah hruaitu pakhat nih zei bantuk lungput, ziaza le khuaruah dah a ngeih awk si tiah na ruah?
TT: Kei hi kanmah Laimi sin cun hnangam tuk in (comfort zone) a rak um mi ka si. Ka nu le lei vialte hi chawlehthalnak lei a cawl mi an si, ka pa lei hi biaknak lei hruaitu an si. Ka hmet tein herh mi ngei lo in kan ti lai cu very com-fortable zone ah ka um. Le, atu Kawl ram an zoh tik ah 70-78 chawlehthal lei mi ngei pawl i an fale hi an pale tluk in hlawhtlinnak an hmu kho ti lo. Mirum, biaknak le zungnem lei tuan mi fale zong cu thiamthiam a si. Cucu zeiruang a si ti cun herh mi ngei lo in an um i an hnangam tuk ca ah a si. Riantuantu nih upat an pek hna, an pale nih komh cia mi kha an hawik-om ah an cang colh. I, anmah cu comfort zone an um ca ah zeihmanh a thar an hawl kho ti lo, an taang dih. Cucaah mino nih a pakhatnak ah comfort zone hi kan lonh, kan pah chih ngam a hau. Hi comfort zone hi ka thancho nakding ca ah a ka dawntu a si ti ka hngalhnak cu carelnak thawng in a si. Comfort zone in ka chuah khawhnak cu ca ka rel tuk ca ah a si. Hihi a bia-pi taktak.

A pahnihnak ah, hruaitu nih a ngeih awk herh mi thiamnak (leadership tualification) kong he pehtlai in kum zabu kul le khat kan rak luhka, 2002 i hlathlainak an tuah mi ah: hmailei cuanh khawhnak, raltha tein biakhiahnak a tuah ngam mi, tbk. a si rua lai tiah an rak ruah. Asinain hlathlainak a phi a chuah tik ah pakhatnak a si mi cu dinfelnak (honesty) thotho a si ko. Kum zabu 19, 20 tehna kan zoh tik ah hruaithiamnak ah tluk awk tha lo in a tha bik mi cu dinfelnak hi a si ko. Cucacun hruaitu ca cun dinfelnak, fianghlang tein riantuan hi a biapi cem tiah ka ruah ko. Hihi cu zeibantuk chan kan va phanh zong ah i tlaih peng ding ah ka chiah mi a si. Cawnpiaknak ah ka hman tawn mi cu: ka theih lo mi cu ka thei lo, ka theih mi cu ka theih, ka theih lo mi khi ka theih (ka thei bak lo ti mi khi kai theih), ka theih bak ka ti mi cu ka theih bak. Hi pali hi tlaih bak a hau. Atu a poi mi cu theih lo mi zong kha thei bantuk in um. Cu tik ah a thei mi sin in ruahnak zong kan ngah kho ti lo, cucun theih mi kha thei lo bantuk in um i tuah ngam than lo. I, hi pawl nih hin dinfelnak (honesty) ti mi cu a hrawh ca ah hihi kaa tlaih peng mi a si.

Cun, mino ka si i atu hi riantuanpi hawi 550 leng ka ngei. Cu hruainak ah a biapi ngai in ka hmuh mi cu nu tling patling sinak asiloah puit-ling mi sinak (maturity) kan herh. Mino cu ai thlen a rang mi kan si, kan hmuhnak a rang. Cucun, thil a hun i thlen kha kan hngak kho lo. Zokzok in thlen kan duh. Khakha i ralrin deuh kan hau. Fekfuan (stable) tein rian kan kalpi khawh a biapi ngai. Mino tampi upa nih hmunhma an pek duh ve lonak a ruang pakhat cu kan puitlin (mature) lo ruang ah a si. Biakhi- ahnak tuah tik ah kan puitling kho lo, caan upatnak kong ah puitling kan lawh lo tik ah hnon kan si deuh rua tiah ka ruah. Cucacun puitling mi si hi mino nih kan i zuam deuh a hau tiah ka ruah. Kei hi upa riantuanpi hawi tampi ka ngei. Upa ngai cang mi pawl cu thil thar pakhat kan tuan lai kan ti tik ah an ngamh ti lo. Cucun, an fum cang, thil kha a cuai an thlai tik ah a luan cia mi kum 20,30 lio ta kha an i rinh peng. I, mino hruaitu ca hna cun a har ngai. Cu bantuk zawn ah cun mino nih puitling deuh in kan um a herh. Anmah an hmuhning le ruahning kha theihthiampiak in lungsau te le zi-almal tein thlennak lei ah kan kalpi hna ding kha a biapi ngai. Cu si lo in rian hna phuah viar tbk a si cun thanchonak lamthluan kha a cat lai. Lungsau a hau. Bu pakhat chung ah bu dawtnak lungthin a ngei bik mi cu sau bik a tuan mi kha a si ko. Cucu kan upat hna a herh.

Hruainak ah ngeih lo awk tha lo mi cu tinh mi (vision) hi a si. Vision ti mi hi tek tlak phun in rak tlak mi khi a si lo. Zeidah mizapi ca ah tinh mi ka ngeih ti kha a herh. Tinh mi a ngei lo mi nih nawlngeihnak an ngeih a si cun kan thangcho kho bal lai lo. Hruaitu a ngei lo mi nakin tinh mi a ngei lo mi nih an hruai khin thanchonak a hnu deuh. Tinh mi a ngei lo hruaitu nih an kan hruai cun hruaitu ngeih lo nakin a fak deuh. Ziah ti cun tinh mi a ngei mi hruaitu ding pawl kha lam a phih hna. Cu ai tinh mi cu a tuanchuah khawh ding mi kha a si fawn lai. Cun thil hi a thatnak lei in hmuh thiam zong a biapi ngaingai.

CD: Donghnak bik ah chim na duh mi?
TT: Ramkomh Kawl ram ah kannih Chin mi hi ramkulh zong a ngei ve mi miphun kan si. Tik ah rampi huap zong in min a ngei zungzal mi, a lang kho zungzal ve mi si ve usih ti hi ka duh bik mi a si. Ziah ti cun Chin kan sinak lawng si lo in Khrihfa ramkulh a aiawhtu kanmah lawng kan si caah a si. Ramkhel lei zong in Vice Presi-dent tiang kan hun si kho ve cang. Hlasak zuamnak lei ti ah le zei zuamnak poh ah a bik in Karen le Chin kan si ko. Kan manh ngam lo ding mi zanmang a um ti lo. Fimthiamnak lei zong kan hun kai thluahmah te lai ka zumh. Ramkulh le ramthen cio ah hmun um media zong ah a thangcho lei kan si cang. Cu bantuk in biaknak, zatlang, chawlehthalnak le lentecelhnak tbk in a lamkip in ram pumpi huap in kan langh khawh nakding hi kan saduhthah a si.
Pumpululh Club kan dirh mi zong hi Kawl ram cu pumpululh kan uar. Kan mit hi pumpululh ah aa fun dih. Mit aa fun dihnak hmun ah Chin Club hi um ve seh ti kan duhnak a si. Cucaah Chin mizapi zong nih nan lungtling in kan chuih khawh deuh rih lo hmanh ah cat lo in thazang kan pe peng ko u tiah kan sawm duh hna.

 

Biahaltu: Salai Kep Chin Thang (ASSOCIATE EDITOR)
A hmun: GFA, Yangon
A ni: February 8, 2018

 

Ref: Vol.4, No.1 (2018 February) thla chuak Chin Digest Editorial
Hngalhternak: CHIN DIGEST hi Fidi Foundation @The Chinland Post nih thlahnih ah voikhat lengmang a chuahmi magazine a si.

About The Author