Hakha Electric Mei Man Kong Ah Mipi Cheukhat Lung Tling Lo

Salai David Van| TCP-Hakha| 2021 January 20| Chinram kulh khualipi Hakha electric mei man liamnak kongah hakha mipi cheukhat an lung tling lo tiah theih a si.

Hi kong he pehtlai in min langhter a duh lomi pakhat nih “Keimah hi nu hmei amah te lawng khua a sa mi ka si. Ka inn pa hna hi sabuti, lakphakti tbk a zuar mi an si i chun zaan in mei an hmang nain electric mei man kan liam mi hi tam a thlau bal lo. Keimah te lawng ka si i zeipoah tlin tein ka ngei ko nain ka hman tak tak mi cu zing zaan rawl chuan lawng a si ko. Zaan hmanh ah mei ka vang theng lo i kan innpa hna zat deng peng ka liam ve mi hi cu riantuantu thiltuah dik lo si ko lai. Hihnu ahcun meter box check tu an rat tik ah inn ngeitu kan theihter hna she law inn ngei tu zong nih zeizat kan hman timi tha tein kan zoh ve hnu ah tial hna seh law a tha. A tu cu meter box check tu an rat le rat lo hmanh kan thei bal lo tiah” TCP ah a chim.

Hi kong ah min langhter a duh lomi pakhat nih Hakha eclectric zung riantuan, meter box check tu cungah a lungtlin lonak hitihin a chim “ Kan meter box checktu hi a fel lo. A ruahnak lawng tein kan mei hmanmi units a tial. Voikhat cu inn chung ka thut ko lio ah meter box check tu cu a ra i kan inn leeng hmanh kai loin cycle cung khin kan mei hmanmi units cu a tial. Kan meter box hi thutdan sang cung dir lo cun innleng hmanh in a hmu kho mi a si lo tiah” TCP ah a chim.

Cheukhat tu nih cun kanmah nih kan hman mi te si ko i zeizat a va si zongah kan liam awk a si ko. Cun kan meter box check tu zong a fel ngai i a rat fatin te meter box ka check cang lai tiah a kan chimh i zung nih ca an kan pek hlan ah zeizat kan liam ding a si zong kan I theih cia peng ko tiah an chim ve.

COVID-19 ruangah Ministry ah Of Electricity and Energy, Myanmar nih a langhter ningah a luancia 2020 July thla thok in December thla tiang mei man units 150 tiang dawt a si tiah theih a si.