Hakha Peng Electric Mei Man A Zohtu Nih Ningcang Tein Meter An Zoh Khawh Lo Ruang Ah Mizapi Harnak An Tong

Salai Tikhing| 2018 January 16| Chin ramkulh khuahlipi Hakha ah mei man a zohtu (meter tlaitu) pawl nih thla fatin te ningcang tein meter box zoh le a sining tein zoh an fel lo caah mipi lei kap in mei man kongah buainak le harnak an tong ti kan theih.

Hi kong he pehtlai in The Chinland Post nih Chin ramkulh Electric zung lutlai Pu Thawng Zo Khai cu kan ton i;

“Hakha ah hin meter box 6400 a um. Cu vialte a rel i a man a zohtu ding ah minung 5 lawng kan ngeih hna. Ramkomh cozah pi nih ri a khiah ning ah meter box 700 kha minung 1 nih tuanvo a lak lai ti. Asinain kannih cu minung 5 lawng kan ngeih caah riantuantu pakhat meter box 1280 a zoh a herh tinak a si. Cu ruang ah cun thla fatin te nan inn cio ah ra in meter box zoh le mei man rel hi an tei bak lo, cucu kan i pheh lo. Asinain thlakhat dan ti bantuk tal in caan hman tein zoh ding cu kan forh peng ko hna. Ningcang loin tangkaa hal ti bantuk a um le nan lungtlinlonak a um ahcun zalong tein kan sinah rat le chim khawh a a si. Nan fian lo mi kan in chimh hna lai, cu kanmah riantuantu kan nau le zong a herh ning in kan rengh ve hna lai” tiah a chim.

Meter box nih a hmuhsak mi unit le mei man umtu ning cu; Unit 1-100 kar ah 35MMK, Unit 101-200 kar ah 40 MMK, Unit 200 cung a kai ahcun-50MMK. Laitlang ah buaktlak in zapi nih hmanmi mei man hi 46, 47 hrawng a si. Cun rawldawr, sipuazi caah a hmangmi pawl cu unit 1-500 kar ah 75MMK, 501-10,000 ah 100MMK, unit 10,001-50,000 kar ah MMK 125 tiin a tam deuh ve. Cun meter box hi anmah cozah lei chambau ruangah a kangh (a rawh) ahcun anmah electric zung ah thawng theihter i anmah nih an phoih hnu in zung an ap a si tawn.

Pyidawtha sang ummi pastor pakhat nih, “meter box zoh lo le mei man rel lo bak an ruah damh in an kan khiah piak lengmang timi hi a fiang tuk. Mizapi nih cun meter box zoh i unit zeizat kan hman, tangka zeizat liam ding kan ti bantuk kha hngalh cio dih a si lo cu mu. Thla hnih voikhat hrawng khi cu hei si sehlaw aa zia, an duh ah thla li thla nga hna an zoh rua lo, a hnu ah kan mei man cu a sing leng hna a phan. Cun Hakha sang kiken deuh a ummi pawl hna khi sing tampi liam a hau cang mi an tam ngai lai. Cun kannih hna hi mei man cu a tlawmbik 20000MMK hrawng kan liam peng. Meter box an zoh zong a tam thiam thiam. Cutikah ka ruah mi cu meter box zoh loin an kan liamter mi hi meter box an zoh tik zongah an kan zuhpiak ti rua lo ti hi a si” tiah TCP ah a chim.

Riantuantu minung an tlawm mi kongah Pu Thawng Zo Khai nih, “kannih zung hi riantuantu thar lak tikah voikhat te ah a hmunmi riantuantu dirhmun in rian pek an si lo. A tlawmbik kum 2 in kum 7 kar rian an tuan ta a hau. Cu chung cu nihlawh in man pek an si. Nikhat ah 5000MMK lawng pek an si. Zung dang cu rian sok tikah pek colh an si. Cu tikah kannih sinah rian a sok mi an tlawmtuk cun nu cu meter lei tuantu ding ah cun kan duh deuh hna lo tikah pa lawng kan duh fawn tung hna i minung kan har ko. Cun meter box zoh loin mei man an khiah tik ah mei man a tlawm ahcun hohmanh an holh lo, a tam tik lawngah an zai cio. Hihi a tha lo ngai. Mei man a tlawmtuk ahcun kannih kan meim man a tlawm tuk meter box an kan zoh piak rua lo tibantuk in kan chim hna sehlaw thla fatin a si khawh lo hmanh ah thla hnih voikhat tal cun ningcang deuh tein kan tuah khawh hnga” tiah a biapeh ah a chim.

Mei a hmangtu zong nih meter box zoh kan thiam a herh, cun mei man rikhiah mi zat catlap an kan pek mi a tang lei ah khin zulh phung le tuah lo ding pawl an tial mi zong rel a herh i mei man tunnak zung ah ca an tar mi zong khi felfai tein rel le hngalh a biapi. Cun meiman an zoh caan thla 27 in thlathar ni 5 tiang a si i mei man pek caan hi ni 11 in ni 25 tiang niruk ni le zarhpi ni zong zungkhar um loin pek khawh peng a si.+++