Thantlang Lah-wah-kah Zung Nih Hmat-pungtin Tuahman An Khirh Than Hna

Salai Elvis| 2018 January 16| 2018 January 11 ah hmant-pungtin (NRC) aa tuahmi Rebacca Duh @Duh Tin Tial le a u fanu Van Tha Sung  nih Thantlang lah-wahkah zungah i tangka an dih mi  cu January 15 ah an khirh than dih hna tiah tuanvo ngeitu sin in thawng kan theih.

Rebacca Duh @Duh Tin Tial cu hmant-pungtin tuahnak caah 70,000 Ks le Van Tha Sung cu 40,000 Ks dih in hmat-pungtin an i tuah mi cu Thantlang lah-wah-kah lei nih thla 4 a rauh hnuah atu bantuk in an khirh than hna. Tuan deuh inn chungkhar cazin tuahnak caah Stalin Tha Cung Lian zong 25,000 dih in a rak tuah mi zong an khrih chih tiah theih a si.

Hi kong he pehtlai in Rebacca Duh@Duh Tin Tial nih “hi cu a har pah lai caah a dih pah lai an ka ti thil sining zong ka thei lo caah ‘e’ ka ti ve ko, cu dih ah tlawmpal chap ding na ngei ti lai maw an ka ti i ka chap than hna. Kyats 70,000 ka dih, ka fanu cu hmat-pungtin aa tuah kaa a si caah 40,000 an hal ve i a ka chimh tikah kan lau cang. Tangka kan ngei ti lo caah kan hawinu sinah kan va cawi i an mah lila nih cycle in an kan zulh rih. Facebook ah kan tialmi zong hi ka huat hna ruang le report ka duh hna ruang zong a si lo. Thil sining ka theih lo ruang le midang nih teh zeizat dah an dih ti theih ka duh caah ka tialnak a si. Tangka an ka khrih than mi zong zeitin ka tuah lai, a hman zong ka hmang ngam lai lo, ka lung zong nuam ve lo ngai” tiah Duh Tin Tial TCP ah a  chim.

Thangtlang lah-wahkah zung lutlai U Tun Tun cu The Chinland Post nih bia kan hal tikah “mah tangka hi kanmah lungtho tein kan hal i kan lak mi a si hrim lo. Sian tawk pek khawh a si kan ti i an mah lungtho tein an kan pek mi a si ko, an kan pek ko caah tiah kan i lak ve. Pathian nih thluachuah in pe seh an kan ti ta rih. Cu i a lungtling lo caah facebook le Online media ah an tar kan hmuh tikah kan lung tha ve lo caah kan khirh than hna nak a si. A ngaingai tiah cun Singapore in a tlungmi a si tikah, hmat-pungtin tuah Thantlang ah an ra, khoika hmanh ah a min a um ti lo,  Stalin Tha Cung Lian zong tuan ah innchungkhar cazin ah a um ti lo India ah Bible sianginn a kai mi a si, inn chungkhar cazin ah chiah than an duh, mah nawl in chap le remh khawh a si lo. A ngaite tiah cun upadi he aa ral kah tuk caah tuahpiak lo khawh zong a si, cun upadi ning in thlathum in kum thum tiang thong thlak khawh an si. Dawtnak in an kan pek mi hiti an kan mawhchiat than hi cu hmailei zung an rat tikah an mah ca tuah dawnkhantu a si sual lai” tiah Thantlang lah-wah-kah zung bawi U Tun Tun nih TCP ah a chim.

Atu bantuk in Thantlang lah-wah-kah zung nih tangka an khrih thanmi hna cu Rebacca Duh @Duh Tin Tial cu hmant-pungtin tuahnak caah 70,000, Van Tha Sung  40,000 le Stalin Tha Cung Lian inn chungkhar cazin tuahnak 25,000 cu a ningtein an khrih than hna tiah theih a si. +++

Leave a Commnet

%d bloggers like this: