Hakha Ral Hmung Certual Ah Shopping Mall Sak Ding Timh Tuahnak An Ngei

Hakha TCP |2019 October 10| Hakha (Hakha khuathar) ah a ummi Ral Hmung Certual ah Shopping Mall sak ding in timh tuahnak an ngei i zeitik an sak lai le zeitik an dih lai ti cu a fiang rih lo Chin ramkulh lam le suul lei Minister pu Sui Thio nih a chim.

“Hi Ral Hmung Certual ah Shopping Mall sak ding mi cu zeitik kan sak lai, zeitik dih ding , zeizat budget a dih lai ti hi chim awk a tha rih lo, cun dot zeizat in sak ding timi zong a fiang rih lo.A hmasa bik ah a hmunhma hi tha tein cawh dih ta a hau lai. October 8 ah khan meeting kan ngei i minung 40 hrawng an kai. Hi Shopping Mall saknak ding caah a tlawmbik billion 20 Ks hrawng dih ding a si caah cozah lei zong nih hnatlak pinak kan ngei rih hna lo. Hi kong ah hin meeting zong tuah than lengmang a hau mi khi a si. Hi Shopping Mall saknak ding caah hin cozah lei budget hman loin Developer lei nih tuanvo lak in an sak lai. Mipi lei zong nih sak ding ah hnatlaknak an ngei cang i a rannak in sak hmanh an duh cang” tiah Chin ramkulh lam le suu lei minister Pu Sui Thio nih The Chinland Post ah a chim.

“Hi Shopping Mall sak ding caah timh mi Ral Hmun Certual cu kan mah cozah lei nih zoh mi si loin mipi lei nih an duh mi a si. Mipi lei zong he hnatlaknak ngeih mi tein sak timh hi a si” tiah minister Sui Thio nih a chim chap.

Hi kong he pehtlai in Hakha certual kan izat lo lak ah tiah a duh lomi cheukhat an um nain Hakha zatlang bu hruaitu upa pakhat nih “Khuathar lei nupa nih an lungtlin pimi a si ko caah zeihmanh kan holh lonak hi a si” tiah a chim.

Hi Ral Hmung Certual le Sianginn hi a zapi Ekah 20 hrawng a si i sianginn caah Ekah 16 le Shopping Mall caah Ekah 4 in timh mi a si tiah kan theih.