Hakhthar Ah Innhmun Kong Lungfahnak Hraam Thawng Cakuat
The Chinland Post| 2018 February 16| Kanmah hi Hakha Khuahlun sangmi kan si. 2015 kum Hakha rawhralnak ton lio ah harnak a tong vemi chungkhar kan si. 2017 November thla ah Hakha penguk zung nih Hakhathar, Falam lampi cung, Kep Lo lungdonh phak hlan te ah innhmun a kan pek. Hi innhmun cu Hakhathar khuabawi hnatlaknak le zohpinak in Hakha penguk zung nih pekmi kan si.
Innhmun zong kan thianh i kan kulh dih hnu ah Pu Lian Thawng Bik nih hika ah inn nan sa kho lo. Kanmah ram (Pupa ram) a si. Nan haukulhmi thirhri vialte phoih than dih uh a kan ti. Cu tlawmpal ahcun Pu Lian Thawng Bik cu Hakhathar khuabawi kha innhmun kulhmi thirhri phoihter dih ding in a fial.
Hartong caah innhmun an sakmi le innhmun a kan pek ciami atu bantuk in sa hlah uh tiah a kan thlauh thanmi hi cu sullam ngei lo bak a si. A ruang hna cu;
Penguk Zung Lutlai
Khuabawi nih innhmun zohpinak le theihpinak in penguk zung nih innhmun pek kan si. Penguk zung lutlai nih pupa ram a um lo, innhmun va thianh u law inn va sa colh ko uh. An buai hnawh hna ahcun keimah nih taza ka cuai lai a kan ti. Asinain February 13 ahcun Pu Lian Thawng Bik nih Penguk zung lutlai aa ratpi i inn nan sa kho than lo. Hi hmun cu tihnung hmun a si a kan ti. Anmah nih zeibantuk hmun dah a si timi an hngalh bu te in inn hmun an samh i a kan pekciami chuh than le inn nan sa kho than lo a timi bia hi cu a dikfellomi biakhiahpiaknak le duhdanh ngeih, zeirello bak a si ti kan ruah. Hihi Pu Lian Tahwng Bik he an karlakah hnatlaknak ngeihmi um dawh a si. Cucaah Penguk zung lutlai nih dikfelte in biakhiahnak a kan tuahpiak lomi cung ah kan lung a fak, kan ngaih a chia. Mizapi zong nih zeitindah nan ruah cio, a si awk a si ko maw?
innhmun pekciami innsak ngolter thanmi
Pu Lian Thawng Bik
Ka pu nih cozah sin ah Sa-ciat-mee caah hmatpungtin a rak tuahmi a si tiah khuabawi sin ah a chim. Kanmah sin ahcun hi pupa ram cu kan cawkmi a si a kan ti. Aho sin ah dah nan cawk ti ka hal i ka hngal lo a kan ti. Khuabawi hnatlaknak he penguk zung nih hmun a kan pekcia cang i a kan buai hnawhmi kong ah siseh, hi kong a buai tuk hnu i khuabawi le penguk zung lutlai lila nih an dirpi thanmi kong ah siseh, a dirhmun zumh a tlak ti lo. Amah ram taktak a si ko ahcun zeiruang ah dah khuabawi le penguk zung nih hmun a kan pek? Hihi kanmah dohkalh in ningcanglo in khuabawi le penguk zung lutlai rian a tuanpi hna ti kan ruah caah kan lung a fak.
Khuabawi
Hi innhmun kong ah khuabawi nih hmun zohpinak in penguk zung nih pek kan si. Hika hrawng hmun cu hartongmi Khuahlun tefa ca bak ah hmun samhmi le pekmi hmun a si. Hihi Pu Lian Thawng Bik sin ah na kan chimpiak lo maw? Penguk zung nih hartongmi hmun an pekmi a si tiah a kan chimhpiak duh lomi hi kan khuaruah a har. Kanmah hartongmi dikfelte in chimpiak le tanpi cu um rih seh. Vawlei le innhmun kong ah buai kaa tim lo. Atu bantuk nanmah pumpak le chungkhar buainak ahhin ka khuabawi upa sinak hman kaa tim lo a kan ti. Hi a bia hrimhrim hi kan celh lo, kan lung a fak. Sang chungmi nih harnak le buainak kan tonnak zawn i a kan tawlrel lo le a kan tlangtlak lo ahcun zei rian khi dah a va tuan ti hnga? A kan dirkamh lomi le tanpi lomi cu va um rih ko seh, atu bantuk in a chimmi bia hi ngaih a chia hringhran ko. Ramchung ramleng nih fak deuh in rak ruat cio ve uh. Hiti hin bia a chim awk a si ko nan ti maw?
Catialtu: Pi Fam Vang (Hakhathar)
Phone: 09256128708/09449929774
Biakilh: A cunglei cabia hi The Chinland Post lungput le ruahnak aa tel lo, Editor sin cakuat pekmi kha zapi rel khawh ding in kan rak thanhtu a si.
About The Author
