Hnaring Khua Certual Chung I Cozah zung Sak An Duh Lo Caah Lam Zawh In Duhlonak An Langhter

TCP-Thantlang| 2019 July 15|    Thantlang peng Hnaring khuapi an pupa nih rak tuahmi certual chungah cozah zung sak timhnak kong le motor lam nih a tanmi kong cu duh lo in khuami minung 300 renglo nih July 14 (zarhpi ni) ah duhlonak langhter in lam an zawh tiah kan theih.

Hnaring siangsangruun certual cu an pupa hna nih an mah minung thazaang tein an rak cawhmi a si bantuk in rawhral lo ding kong, certual a lai in motor lam pi an kalter nak kong, certual kam kip ah cozah zung saknak ding kong timhtuah mi cu khuami nih an duh lo caah a tubantuk in duhlonak an laghter hi a si.

“Tutan duhlonak lam kan zawh hnu, zarhkhat si lo ah thlakhat chung ah khua mi nih ka hal mi an kan tawlrelpiak lo a si ahcun  Media sin ah thawngfianhnak kan tuah lai. Cu i an kan ngaihpiak rih lo si cun  Chin ramkulh cozah zunghmai ah duh lonak kan langhter rih lai” tiah khuami Michel nih a chim.

Hnaring khua cu khuapi sinak pek a si bantuk in cozah zung saknak kongkau zong an tawlrel liopi a si. Hi duhlonak lamzawhnak cu July 14 chung suimilam 12:30 ah mizapi tonnak ngeih hnu suimilam 1:30pm in lam zawh an thok i zanlei suimilam 4 tluk ah an dihter tiah kan theih.

(Ref: Lautu Film Channel, RVA Falam Service, Chin World, Photo: Peter Zin)

Na ruahning rak langhter ve.. (Leave a comment)

%d bloggers like this: