India Nih Minung Nuai 4 Rammi Sinak Chuh Ding In A Thanh
City Hunter| 2018 July 31| India ram, Assam state ah kum 10 renglo khua a sa cangmi minung nuai 4 cu rammi sinak chuh an si lai tiah an min cazin cu tuanvo ngeitu hna nih an thanh.
Cu cazin chung ah mi tamdeuh cu Bengali holh a hmangmi Islam biaknak chungtel an si. Anmah nihhin Bangladesh ram timi a chuah hlan 1971 kum hlan i India ram ah khua an rak sak kong tette an hmuhsak a hau lai. Hiti kan tawlrel cu Bangladesh in phunglutlo khua a rak sami pawl thianhchuah kan duh caah a si” tiah India cozah in tuanvo ngeitu hna nih an chim.
Minung cazin thanhchuah a si ruang ah buainak a chuak lai ti an phan caah atu cu ahohmanh hmakhatte ah ramchung in kan thawl, kan dawi rih hna lai lo tiah tiah tuanvo ngeitu hna nih an chimchih.
Hi minung nuai 4 cu rammi sinak caah biaceih zung ah ayukhan nak nawl an ngei lai nain caan saupi biaceih zung ah biaceih an tong kho.
1971 March 25 ah Bangladesh ram cu Pakistan ram in a chuak i a dangte zalonnak an thanh. Cu lio ah ramhnih ralpi a rak tho i minung nuai renglo India ram, Assam state chung ah an zaam.
Hi ralpi a chuah hlan ah Assam state ah a phan i khua a sami hna cu India cozah nih rammi sinak a pek hna. Atu lio Assam state ah milu zapi hi nuai 30 hrawng an si. Bangladesh ram tiah zalonnak thanh hnu i Assam state a rak phanmi le khuasami pawl kha atu bantuk in rammi sinak an chuh hna hi a si.
India nih phunglutlo khuasami Islam biaknak chungtel pawl cu ramchung in kan thawl hna lai tiah tu lio cozah nawlngeitu Hindu Miphun Party tiah mizapi nih an hngalhmi BJP party lutlai Chief Minister Narendra Modi nih a chim.
Innpa a simi Bangladesh ram milu nuai 4 an ram chung ah kan kuat hna lai tiah India cozah nih a chimmi cu fawite in cohlan an tim hna lo.
Atu thil kong hi India nih minung tampi rammi sinak ngei lo in a serchuahmi a si tiah hlathlaitu hna nih an chim i nichuah Asia ramchung ah buainak a chuak kho tiah an ruahdamh.
Ref: BBC
About The Author
