Kalay Peng, Sekan Khua Kahdohnak Ah SAC Lei 3 An Thi
The Chinland Post | 2023 October 9 — Sagaing ramṭhen, Kalay peng, Sekan khua ah a cang mi kahdohnak chung ah SAC lei 3 an thi tiah CDF-KKG nih thawng a thanh.
October 7 zinglei sml 8:00am hrawng ah Kalay peng thlanglei, Myohla lei in a rak lut mi SAC ralkap pawl cu Sekan khua ah dothlennak phu pawl nih an kah hna caah kaphnih karlak kahdohnak sml 1 leng a rau i SAC ralkap 3 an thi, 8 nak tlawm lo an i hliam, kahdohnak chung ah Kalaymyo, Taungphilar ralkap nih hriamngan pehzulh in kah an bawmh hna caah mipi hriamtlai pawl hnu an kir ṭhan tiah theih a si.
Kahdohnak chung ah CDF-KKG, CNDF (TZ), CNDF (NA), Kalay PDF hna an i bawm i SAC ralkap hriamngan nih CDF-KKG hriamtlai 1 thinphan awk um tuk lo in a hliam tiah an thanh.
October 8 zaanlei ah mipi hriamtlai pawl hmunhma an khuarnak cu SAC ralkap pawl nih Drone in bom an thlak hna nain mipi hriamtlai lei an him tiah theih a si.
SAC ralkap pawl cu Sekan khua ah hmunhma an khuar i mipi inn pawl an khangh, hriamngan an thlah thlorh caah mipi aa hliam mi zong an um.
Kahdohnak a um caah mipi hna nih Kalay lei ah khualtlawn rih lo ding in CDF-KKG nih ralrinnak thawng an thanh.
About The Author
