Kalay Thlanglei GTU Sianginn Ah Hren Khar Mi Thilphor Motor Pakhat Ah Kyat Sing 20 Pek Lawng Ah Khuachung Luhnak Nawl An Ngei
The Chinlandpost | December 22, 2023 — Kalaymyo thlanglei GTU sianginn pawng ah hmunhma la mi SAC ralkap nih thilri phor motor pawl cu khuachung luh ter loin an hren rih hna i, khuachung luh a duh mi motor pakhat ah kyat sing 20 a pe mi lawng khuachung luhnak nawl pek an si lai tiah SAC ralkap lei nih an ti hna.
Thilphor motor pawl hi hlan ah Gangaw khua in Chinram- Hakha lei in Kalaymyo lei ah an umkal tawn. Tu lio cu Chinram lei kainak an khar ruang ah Chinram ah thlakhat chung an tap i Chinram in Gangaw lei an rak kir than hnu ah atu Kalay thlanglei GTU sianginn ah hmumhma la mi SAC ralkap nih an hren than hna hi a si. GTU sianginn ah hmunhma la mi cu Regional Operations Commands (ROC) (ဒေသကွပ်ကဲမှု စစ်ဌာနချုပ်) nawl peknak in motor pawl khuachung lut kho lo in zarhkhat chung hren khar an si cang. Diver pawl nih motor pakhat ah kyat sing 8 pek ding in an nawl ko hna nain ROC lei nih an duh lo. Kyat sing 20-30 kar pek ding in ROC nih bia an leh hna tiah Zalen media sin in theih a si.
December 19, GTU sianginn ah SAC ralkap bom rap ruangah motor ke 12 ngei diver pa a ke pakhat aa tan i fak ngai in hliam a tuar tiah theih a si.
Photo/ credit – HAK- Zalen
About The Author
