Kalaymyo Peng Thlanglei Indaigone Khua Cu SAC Ralkap Nih An Khangh, Thlanglei Khuate Mipi Tamdeuh Cu Kalaymyo Khuachung Lei Ralzaam An Tam
The Chinland post| October 14, 2023 — Sagaing ramṭhen, Kalaymyo peng thlanglei Indaigone khua cu SAC ralkap nih an khangh tiah tualchung mipi sin in theih a si.
October 13, zinglei ah SAC ralkap cu Kalaymyo thlanglei, Indaigone khua ah lut in mipi umnak inn pawl an khangh, tualchung mi belte cu a luancia zarh chung ah khua chuahtak in an zaam dih.
Ralhrang nih Kalaymyo thlanglei hmunkip ah an thazang chap ding in an minung an kuat lengmang. Aungthayar, Myohlah, Hmuntha le Sekan khua pawng kahdohnak cu September 26 in October 3 tiang a um. Ralhrang an kir dih rih lo ruang ah thawngpang a ṭha rih lo.
September 26, zinglei sml 8:00am ah Kalaymyo thlanglei, Kalay in meng 30 hrawng aa hlatnak Aungthayar khua ah SAC ralkap le pyusawhti phufonh thazang 100 le mipi ralkap hna karlak ah minute 30 hrawng kahdohnak a chuak tiah CDF-KKG nih thawngthanhnak an tuah.
September 27 ah Aung Thar Yar khua in Hmandaw khua lei ral hmaisial in a rak kai mi SAC ralkap le pyusawhti phu le mipi ralkap cu Hmandaw khua pawng ah kahnak a um than. Mah kahnak ah SAC lei an fak ngai, CDF ralkap hliam a tuar mi pakhat a um tiah CDF-KKG sin in theih a si.
SAC ralkap pawl nih October 7 ah khan Sekan khua cu nai October thla zarhkhat chung tiang ah inn 100 leng khangh an tuar hnu ah, Indaigone khua zong an khangh ṭhan, tiah tualchung mi hna nih cun an chim.
Kalaymyo thlanglei SAC ralkap nih kahdohnak a tuah ruang ah Sekan, Santa, Siadaw, Sindaw, Myaungsun, Sisan le Kalaymyo thlanglei khuate tam deuh ralzaam mipi thong tampi hna cu kalaymyo khuachung an zaam hna tiah tualchung mi sin in theih a si.
About The Author
