Kan Lai Ringawn Luang Chinchin Seh!

By Dio|2020 January| Kan Lai ringawn hi chan tiluan a kal bantuk tein ruahning leng pi in a tthangcho tiah ka hmuh. Hlan ahcun kan music le kan hla hi anmah le an chan cio i miphun dang hla pawl he ngaih chun tikah a rak i dang tuk. Atu ahcun a lam kip in kan tthancho ning hi a khawh bak in aa khawt ko cang. Mirang hla he thleidan awk ttha bak loin quality a tthami Lai hla hna tthangthar mino kan naule nih an chuahpi hluahmah ve cang.

Laimi hi mi duhce bak kan si. Zei kan tuah poh ah a ttha lomi kan duh lo. Kan pu kan pa, kan nu kan pa, kan u le chan in inn le lo an sak zongah an neih namiang le an thazaang umek in a tthat khawh chung in an tuah. Zeitluk ttha in dah an tuah ti cu an sining nih a rak phak le phak lo cung tu ahkhin a rak i hngat ko.

Pathian nih kan phu kan tawk lo piin a kan cawisan i nihin ahcun miphun dang hna he zawi khat ah a kan chiah ve cang. Hawi ngeih kan ngei kho i hawi tuah kan tuah kho ve cang. Vawleipi a tthanchoning nakin Laimi tthanchoning cu a let in a khulrang ko cang.

Cu chantiluan nih cun kan Lai ringawn zong a vun cawisan tikah kan chunmang hmanh ah kan rak suaisam khawh lomi Lai ringawn tthattha nifatin ti nawn in a hung chuak. Quantity zongin kan tthang hi Quality zongin kan tthangcho. A zei ti lei tthancho poh hi a ttha dih tiin ka ruah ko. Quantity le Quality lei in kan tlinh rih lomi hla phundang tampi a um rih nain Q2 in kan luang hluahmah ko ti hi kei ka hmuhning a si.

Atu lioah Lai ringawn tthanchonak ding caah a herhmi tampi lakah kan herh bik tiah ka ruahmi pahnih cu a tthawngmi Lebel System phun ngeih le Music Instrument tum thiami tam deuh ngeih ding hi pahnih hi an si. Mah kong hi topic dang in tam tampi ceih haumi an si. MMID ka zoh peng ve Winner kong nakin Kawl miphun zeitluk in dah muisic ah an rak pil cang i an kan lonh timi le Tangka thazaang hna zeitluk tiangin dah music caah an phum ngam cang timi mit khin ka zoh deuh. Kan tthanchoning aa khawt kan ti ko buah a kan lonhning a rak i khawt deuh maw ti hna khi ka ruat i hmailei ahcun Lai hla hi Kawl hla le Mirang hla nih an kan chilh dih te sual lai maw ti hna khi ka phang chinchin.

Kan Lai ringawn tthanchonak dingah le lam ding lam hman ah a luan khawhnak dingah ringawn vulei ah a tlonglengmi kan dihlak in ttuanvo kan ngei. Miphun ngan pipi nih cun khat le khat i zuamcawhnak a um tikah tthanchonak a um an ti. Nain, miphun hmete le mi tlawmte lawng nih hmanmi caholh a hmangmi kan si caah, khat le khat i zuamcawhnak si loin lungrualnak tuin kal hi kannih Laimi caah cun hlawknak a um deuh lai dah.

Hla fungkhat a chuah khawhnak dingah Hlaphan, Tumtu, Hlasa, Mixing mah le ttuanco cio kan ngei. Mah le ttuanvo cio kan tlamtlinh ko buah Team Work a um lo ahcun Q2 in caan saupi kal ding hi a fawi lai lo. Hihi a biapit ning hi midang nih an theihthiam lo zongah ringawn chung i a tlongleng mi nih cun kan ruah dih ciomi a si ko lai.

Team Work cu zeitindah kan kalpi kun lai timi hi leh awk a har taktakmi cu si. Hi kong hi kan U Herh Lian nih hlanpi in khua a rak ruah cang i zeimawzat cu timhtuahnak zong a ngeihmi cungah a tak in a tlamtlin khawhnak ding hi ringawn chung i a tlonglengmi kan dihlak le ringawn a ttanh i a dirkamhmi hawikawm nih tha nan pek kan pek i kan i teltum cio hrimhrim a hau telai.

Cu bantuk i funtomnak kan ngeih khawh ahcun a miak kan hmuh dingmi a tam tuk hringhran. Keimah nih ka hei ruah banh khawh tawk hmanh ah khin chim ding a tam bak.

Lai hla in pawcawm khawhnak tiang hmanh khi tampi a tthanchoter pinah, lamding lam hmanah a kan luanpi lai, pumpak in kan tuah khawh lomi thil tampi a bu in kan tuah kho lai, kan hla, kan caholh, le kan nunphung tampi a kilven a cawisan lai i kanmah lila lawng hmanh si loin miphundang tiang nih kan holh le kan hla an upat lai. Tthangthar kan mino hna miphun dang music lawngah an tui sual ahcun ka ni thlahpoih ko lai caah hmailei kong ruat buin kan cawl tti hna lai.

Ringawn kan tuah hi kan huam phun a si ca lawng siloin miphun rian kan ttuan zong a si chih. Ringawn thawngin kan nu kan pa, kan u le nih cauk ngeihchiah chawva, fimnak, thazaang tampi dih in cauk chungah an kan khumhpiak ciami kha a tak in kan vun hman i kan nunter fawn. Kan biaknak le kan zatlang nun i cawnpiaknak le kan nundan (Lifestyle) tiangin hmual a ngei. Cucaah ringawn hi sawhsawh a rak si ve lo bantukin, ringawn chungah a tthudirmi kan ttuanvo a ngan zia zong hi philh a fawite. Hla fungkhat ruangah mitampi rawhnak a phan kho i mitampi caah nunnak a si kho ve. Kap 2 har vainam phun khat a si ve.

Ringawn hi a tuah lawngin a rak za lo. Zeipoh hi tuah hlanah ruah hmasa a si. Kan chim kan relmi hi kan ruah caah kan chimmi a si caah a chim tam tiin mi cheu nih an ruah ko lai nain kanmah kan bia le kan hla kong kanmah nih kan chim ve lo ahcun midang nih cun khurkhua ruat cun an kan ruahpi bal lai lo caah chim lengmang ve cu a hau ko.

A caan ah mah pumpak dirhmun in kan chim caan um lai a caan ah zapi hrawm dingin kan chim caan um lai a tthami tu i lakpiak in a ttha lomi tu i hlonh piak si ko seh.

Note: Catialtu ruahnak a si..