Kum Thar Nun Le Kei_Hmuhning Capar

Salai Khin Maung Thein (D.Ed)| TCP-Hakha| 2021 January 12| Pathian lamhruainak thawng in 2021 kum thar cu lawm in ka phan tthan. 2019-2020 kum hi cu Burma ram chung chuak mi kan caah uknak lei le Tlangcung mi Kawl Cozah kahdeih nak nihin tiang a dih kho rih lo hlei ah Paletwa peng ah harnak tonnak le ralzam an zual chin, NCA nih zeidah a chuahpi? Cozah Education System duh lo mi langh ter nak le nihin COVID-19 ruang ah sianginn khar peng a si caah siangngakchia nun a rawk mi an tampi.Tang(9-10)kai mi le siangleirun kaimi mino nun a rawkmi an tam tuk cang. Ramtha um hna mino caah cun Cozah nih online in Zoom in maw cachimhnak nun cawmpiaknak an tuahpiak hna tik ah mino nun a rawk tuk lo. COVID-19 ruang ah Cozah nih lockdown tuah in a lengchuak kho lo le riantuan khawh lo tiang a kham tik ah Kawlram ah cun cacawmnak a um lo hlei ah Kawlram ah mi sifah 70% kan si tik ah Cozah nih innchungkhar pawcawmnak caah bawmhnak a tuah kho lo tik ah innchungkhar harnak ruang ah mino lung rawk in mah te in nunnak a la mi(Suicide) antam. Innchungkhar pa cem nih innchungkhar a zohkhenh kho ti lo ruang ah lungrawk zu ding in mah te a thatmi an tam ngai ti a si hoi.

2008 Constitution and Bylaw duh lo mi langhter nak hluttaw ah tuah zong ah nihin tiang zei san a tlai hlei rih lo. 2019-20 tiang Chinram chung zong ah Kawl Cozah duh lo nak Sandahpiah a tam kum a si men lai tiah ruahnak kan ngei. Chin ramkulh chung ahhin Na-ta-la sianginn 9 a um tiah Chin ramkulh ramri le humhimnak zung cazin ning in kan theih. Chin ramkulh ah a ummi Na-ta-la sianginn 9 chung ah siangak-chia chung in Buddhist 900 hlei an um i Khrihfa a cheu an um, siang cachim chung in Buddhist 114 le Khrihfa 18 an um. Chinram ah Buddhist mi 60199 an si cang. Kawl ram tleng in Democracy ai on deuh ngai mi kan hmuh cio I Biaknak lei in teh thanuamnak thar kan ngei kho ve lai maw? Kum Thar kan phak caan paoh ah mi tampi, abik in, Khrihfami hna nih kan nunnak hi kan ruat than tawn. Kum hlun chungah kan tuahmi thil ttha lo kha hlawt in thil ttha tuah ding in kan thinlung in maw, bia in maw biakamnak kan tuah tawn. Hi kan biakamnak cu a hmun ding a si. Kan tlamtlinh tiang in kan i zuam ding a si.

Toidor Nak In Cawn Piak Mi

Israel miphun cu Izipt sal ah an taan lio ah Pathian nih Moses cu a miphun hawi Israel mi hna kha chanchuah ding in a auh (Exodus 3:10). Hi tluk in a miphun ttanhnak thinlung a pu mi Moses cu Midian ram ah a zaam. A nupi pa Midian tlangbawi Jethro tuu le meheh kha kum 40 chung a cong. Izipt ram siangpahrang fapa dirhmun in a niambik tukhal dirhmun ah aa cang. Moses cu a niam ngaimi nunnak dirhmun ah a um. Pathian nih a nunnak cu phawrhlawt nun in tangdor nun ah a thlenpiak. Miphun ttanhnak thinlung pu in ramdang pa a that ko nain, a nunnak hi thlen a si tikah a dirhmun aa dang tthan. Number 12:3 ah, “Moses cu Vawlei cung mi vialte lak ah lungnem bik a si” tiin kan hmuh. Toidornak cu Pathian kha thinlung ah a sang bik ah chiah i mah kha santlailo bik le a niambik ah i chiah a si.Pathian nih Moses hi a miphun hawi hna chanhchuah ding ah a auhnak hi a miphun hawi dawtnak le ttanhnak (nationalism) a ngeihmi thlarau nak in toidornak thinlung (Pathian hi a sangbik ah chiah khawhnak) tu hi a si deuh tiin an ti. Miphun dawtnak thinlung a ngeihmi cu nunnak hmual pakhat cu a si ve.

Kum Thar 2021 Caah Biakam Thar

Chinmi thong tampi cu Burma ram harnak chung in a kan chuah ter i vawlei cung ram rumbik ah a kan chiah hna. Rili sen kha si lo in, vawlei cung rili lian pipi cung in vanlawng in a kan zuanpi. Kan thazaang in kan sak lo mi inn tthattha ah a kan um ter. Rian a kan pek. Pathian sin in kan hmuhmi Chinmi kan thluachuah hi a tam hringhran. Pathian sin ah lawmhnak chim ding lei kan baa cio ko lai. Kan Lai miphun lak ah Khrih khamhnak a thei rih lo mi thong tampi an um.

Thlang Lairam ahcun biaknak dang nih a chilhmi an tam. Pathian a thei lo mi zumlotu an tam. An nunnak cu thlarau le pumsa in khamh an herh. Hi hna sin ah Khamhnak Thawngttha chim ah kan kal tti kho hna lai maw? A miphun hawi hna chanhchuah ding ahcun Midian ram in Moses cu saltaannak Izipt ram ah a thlah tthan. Ramdang ah Pathian nih training a kan pek lio a si. Lairam ah kan thlarau, thinlung le chawva hna cu thlacamnak he kal in kan miphun hawi hna sin ah kal ve kan hau ko cang. Chinram ah leikhuaza Laimi (Chinmi) zumtu vialte hi zuang tti hna usihlaw Bawipa lopil ah Khrih Thawngttha thlaici cu tuh ding kan si. Ram kip in thlacamnak he kan kal tti ahcun Chinram fing le tlang vialte hi Pathian biakinn an si dih ko lai.

Hi bantuk in, Pathian Thlarau tthawnnak in vawlei hi kan tei khawh lai I Hi vawlei ah a ram kauh tertu kan si kho ve lai. Pathian nih A thawnnak baan in kan tlai cio ko seh!

Note: Catialtu Hmuhning le Ruahning a si I The Chinland Post forhfialnak pakhat hmanh aa tel lo.