Kumhnih Chung Chinram Ah Kum 5 Tang Ngakchia 994 An Thi
Salai Cung Cung|2019 March 25| 2017-18 kum, kumhnih chung Chin ramkulh ah ngakchia kum 5 tang minung 994 an thi tiah Chin ramkulh Ngandamnak zung in kan theih.
“2017, kumkhat chung Chin ramkulh ah ngakchia kum 5 tang a thimi 354 le 2018, kumkhat chung ah ngakchia a thimi 640 an si, kumhnih chung ah a thimi zapi 994 an si. An thih biknak a ruang cu Pneumonia, thla tlinglo, pound tlinglo, le Birth Asphyxia (thawphihnak a siloah mahhngal loin umnak) an si” tiah Chin ramkulh ngandamnak zung in Assistant Director Dr. Sharon Par nih The Chinland Post ah a chim.
“Hi pathum cu damh khawh ding mi lawngte an si. Tahchunnak ah Cancer zawtnak tibantuk cu damh khawh a si lo, nain mah pawl zawtnak hi cu a caanhman tein le ningcang tein thlop ah cun damh kawh ding lawng te an si. Pneumonia zawtnak pawl hi an ngeih leh cangka tein sii-inn asilole ngandamnak lei rian a tuanmi sin ah kalpi colh a hau. Asinain mitam deuh nih an hngal ti lo. Cun thlatlinglo pound tlinglo timi cu naupawi lio ah siibawi asilole ngandamnak lei riantuantu hna sin ah kal lo in mah le duh ning paoh in sii an eidin caah hi bantuk a chuak. Ei le din i hramh khawh lo ruang zong ah a chuak fawn. Nu naupawi lio ah a tlawmbik voi 4 tal siibawi asilole ngandamnak lei riantuantu hna sin ah i zohter a hau. Asphxia timi cu cawnnak ngeilomi sin ah nau an ngeih tikah nau tha tein zohkhenh zia an thiam ti lo caah thihnak hi a tam” tiah a chimchap.
2018 kum Chin ramukulh ah kum 5 tang ngakchia a thimi minung 640 an si i a thih bu in a chuakmi hi minung 241 an si. Milu sining zat tuakchih in kum 5 tang ngakchia tambik an thihnak peng cu Kanpetlet, Matupi le Mindat peng an si tiah kan theih.
2017 Chin ramkulh chung kum 5 tang ngakchia zapi minung 61811 an si. 2018 Chin ramkulh chung kum 5 tang ngakchia zapi minung 62018 an si tiah Chin ramkulh ngandamnak zung in kan theih.
About The Author
