Lai Western Union Bank Nih Minung 11 Laksawng An Pek Cang Hna
Salai Cung Cung|2019 February 22| Hakha um Lai Western Union nih 2018 May thla thawk in an sin ah tangka a kuami paoh awngbali an an tuahpiak hna i a ngahmi hi minung 11 an si cang. Minung pakua nih Sing 10 cio le pakhat nih sing 3, pakhat nih sing 2 tiin an ngah tiah kan theih.
“Hramthawk kan rak tuahka ah cun kan sin ah minung pakhat nih Sing 20 a kuat ah cun ticket pakhat kan pek. Sing 40 kuat ah cun ticket 2 tibantuk in 2018 May le June tiang kan tuah. July thla in Sing 10 ah kan thumh i July thla dih lai hrawng ah Sing 5 ah kan thumh rih. Tu 2019 ah cun kan sin in Sing 2 a kuami paoh ticket pakhat pek an si cang,” tiah Lai Western Union Manager Salai Bawi Bik Thawng nih The Chinland Post ah a chim.
“Hi awngbali zuhnak cu 2018 ah khan cun thla khat chungah minung pakhat nih sing 10 ngah ding in kan tuah. Nain 2019 ah cun thla khat chungah pakhat sing 10, pakhat sing 3 le pakhat sing 2 tiin minung pathum nih sing 15 ngah ding in kan tuah cang. Minung pakhat nih kan sin ah Sing 10 kuat ah cun ticket pa 5 kan pek. 2019 ah cun January ca lawng kan tuah rih i cu kan tuahnak ahcun sing 2 a ngah ciami nih sing 3 le sing 10 ngah ti lo ding in kan tuah. Nain hi kan tuahning hi cu hitining in a si peng lai tinak a si lo. Vanchiat le van that nih a ngeihmi a si ko caah minung pakhat zong nih a pathum ning in ngah dih ding zong in tuah than khawh a si, kan tuahning cu aa thleng lengmang kho ko,” tiah Salai Lungthli Tum nih The Chinland Post ah a chim.
Lai Western Union nih tuahmi lucky draw cu 2018 chung ah ticket pekmi minung cu, May ah minung 46 hrawng, June thla minung 40, July ah minung 106, August ah minung 369, September ah minung 410, October ah minung 337, November ah minung 391, December ah minung 625 an si. Hi chung in minung 8 nih laksawng an hmuh. 2019 January ah ticket pek mi minung 1045 an si i minung pa 3 nih laksawng an hmu cang tiah tuanvo ngeitu sin in kan theih.
“Kan sin in tangka an kuat tikah sing 20 cung cu thumh khawh a si. Thumh loin sing 20 cung an kuat ahcun sing 2 ah ticket pakhat in kan tuahpiak ko hna. Kan thumh hna bel ahcun sing 10 ah ticket pakhat in kan tuahpiak hna. A nai ah pakhat cu kan sin in sing 350 thumh loin a kuat caah ticket 175 in kan tuahpiak” tiah Salai Bawi Bik Thawng nih a chim.
Lai Western Union cu Salai Lungthil Tum tawlrelnak in 2016 March thla in an rak thawk i riantuantu zapi minung 8 an si tiah kan theih.
About The Author
