TABC Khawmpi Ah Ordination 3 Le Pastor Tling Minung 5 An Pek Hna

Salai Elvis| 2019 February 24|ย Avoi 46nak Thantlang Association of Baptist Churches (TABC) BM meeting le khawmpi cu Febuary 21-24 tiang Thantlang peng Thangzang thar Baptist Church ah sunglawi ngai in an tuah i Ordination (Rev) pathum le Pastor tling minung pa nga an pek hna tiah kan theih.

Tutan ah Ordination an pekmi hna cu Rev.Dr. Duh Sang (Thantlang Baptist Church), Rev. Hnem Chin (Tlangkhua Baptist Church) le Rev. Van Neih Cung (Salen Baptist Church) an si. Pastor tlingsinak pekmi hna cu; Pastor Ngun Thawng Lian (Thantlang Centenary Baptist Church), Pastor Denis (Thlualam Baptist Church), Pastor Khamh Thang (Hmunlipi Baptist Church), Pastor Van Ro Hum (Bungkhua Baptist Church) le Pastor Bawi Ram Par (Thangzang Thar Baptist Church) an si.

Atubantuk in Ordination pekmi hna cu anmah le Khrihfabu cio nih an chuahpi hna hnu ah Ordination Board nih pek awk ah aa tlak tiah an ruah hnu ah an pek hna hi a si.

Atubantuk in 2018 kum avoi (45)nak Tlangrua (B) an rak tuah lio zongah Ordination (2) le Pastor minung (3) pek an rak si bal.

Tutan an khawmpi ah khuallian in Rev. Dr. C. Duh Kam (USA)an sawm i hlasatu cu Jenifer Zo Chungpuii tel in a dangdang zong hla an sa hna. Tutan ah khual a rak tlungmi 1,300 renglo an phan. Hmaikum avoi (47)nak TABC BM meeting le khawmpi cu Tikir (B) ah an tuah lai tiah kan theih.

Na ruahning rak langhter ve.. (Leave a comment)

%d bloggers like this: