Lungkua Ah Aa Taapmi Ngakchia Pawl Suimilam 24 Chung Ah An Chuah Khawh Cang Hna Lai
City Hunter| 2018 July 8| Thailand ram Mae Sai khua pawng Tham Luang lungkua chung ah aa taapmi pumpululh phu in ngakchia 12 le an saya (coach) pakhat cu suimilam 24 chung ah kan chanhchuah khawh cang hna lai tiah Chiang Rai pengkomh lutlai nih a chim.
July 8 zingka suimilam 10:00 ah tuahmi thawngfianternak ah Chiang Rai pengkomh lutlai nih, “Atu thiamsang tilio thiam hna cu tu zingka in lungkua chung ah ngakchia pawl chanhchuah ding in an lut cang. An zapite in chanchuah ding an i zuam. Ti lio thiam pawl ngakchia hna umnak an phaknak ding suimilam 5 asiloah 6 chung a rau lai. Siibawite zong nih ngakchia hna an ngandam ko, chuahpi khawh an si cang an ti. Ngakchia pawl lungkua chung ah nungte in a hmutu British tilio thiam phu hna zong lungkua chung ah an lut cang” tiah a chim.
Ngakchia pawl chanhchuahnak caah lungkua chung in an rak chuahnak ding hi a tlawm bik suimilam 8 hrawng a rau lai. Thai ram chaklei hrawng ruah a fak lai tiah khuacaan thanhtu nih an thanh caah atu bantuk in chanchuahnak rian an thawk colhnak hi a si.
July 7 zan ahcun lungkua pawng i nunchanhtu hna umnak cu ahringmi pipe in an kulh dih i tu zingka ahcun media pawl vialte lungkua he 3 kilometer hrawng aa hlatnak khuabawi zung ah an i thial dih.
Ramkip in media 800 renglo an si caah ngakchia pawl nunchanhnak dawnkhantu silonak ding caah cuti an thial hna cu a si. Lungkua pawng i eidin lei bawmchantu vialte zong leng ah an thial dih i lungkua pawng ah lakhruak nunchanhtu motor le midang thiamsang pawl lawng an um cang tiah theih a si.
July 6 zingka ahkhan ngakchia pawl lungkua chung ah oxygen dur a pechaantu Thailand ti ralkap bawi hlun a simi tilio thiam pa Gunan cu lungkua chung ah a thi. Ngakchia pawl oxygen dur a pekchanh hna hnu a kir lei ah oxygen dur aa kenmi nih a dihtak ruang ah a thi tiah theih a si.
Ref: DVB
About The Author
