Lychi Thei He Aa Pehtlaimi Thluak Zawtnak Ruang Ah India Ah Ngakchia 100 Renglo An Thi
The Chinland Post| 2019 June 18| India chaklei Bihar ramkulh ah Lychi thei ah hmuhmi sivai he aa pehtlaimi thluak zawtnak ruang ah a thimi 100 renglo an si cang tiah tuanvo ngeitu hna nih June 17 ah an chim.
Milu nuai 100 tluk khuasaknak India ram i a sifak bikmi ramkulh pakhat a simi Bihar ah atu lio a fak ngaimi khualinh harnak an tuar. Cu khualinh harnak ruang ah minung 78 tiang an thi cang. Cu hlan deuh zong ah khualinh ruang ah Bihar ramkulh suimilam 24 chung ah minung 50 an thi.
Bihar ramkulh ah Lychi thei he aa pehtlaimi Acute Encephalitis Syndrome (AES) timi thluak le thahri kongkau zawtnak a chuak i June thla thawkka ah ngakchia 31 nak tlawmlo an thi tiah an thanh nain atu ahcun a thimi zarhkhat chung ah a kai chin.
Hi thluak zawatnak ruang ah Muzaffarpur i ramkulh a ngan bik cozah sii-inn a simi Sri Krishna Medical College and Hospital (SKMCH) ah ngakchia 85 an thi i a dang private sii-inn pakhat zong ngakchia 18 an thi tiah tuanvo ngeitu chimmi cherhchan in Press Trust of India nih June 17 ah a thanh. Hi thluak zawtnak ruang ah India ram 2014 kum ah a thimi 150 tiang a rak phan.
Ref: Duwun
About The Author
