Maesai Lungkua Ah Aa Taapmi Thai Ngakchia 13 Olympic Puai Zawh Ah An I Thawh
City Hunter| 2018 Tho 4| Argentina ram, Buenos Aires ah tuah dingmi mino Olympic lentecelh zuamnak puai zawh ding in Maesai lungkua ah a rak i taapmi Thai pumpululh phu mino 13 cu October 3 zan suimilam 9:00 renglo ahkhan Bangkok International airport in an i thawh cang tiah theih a si.
Mino 13 he hmunkhat ah hringtu nu le pa pakhat cio, mino hna ngandamnak lei zohkhenhtu siibawi pakhat, lungthin lei thazaang petu siibawi pakhat, pengkomh nih tuanvo pekmi palai pakhat, Thai nunphung lei ministry zung in tuanvo ngeitu hna he an zapi minung 40 renglo an kal.
Bangkok in Turkey ram- Istanbul airport, cuka in Argentina ram Buenos Aires vanlawng tual cu zinglei suimilam 6:00 hrawng ah kan phan lai tiah Thai PBF nih a langhter.
Hi khuallam cu October 3 in 20 tiang a zapi ni 18 chung an rau lai. Olympic lentecelhnak puai a dih hnu ah American ram ah an khuallam an peh lai i New York khua NBC muicawl media i Today Show le Late Night program ah lungkua chung an taap lio an hmuhtonmi biaruahnak an ngeih hna lai.
Maesai khua pumpululh phu an coach pa le sianglairun siangngakchia mino 12 cu a luancia thlathum ahkhan Thairam ah a ngan bikmi lungkua chung an tlonlennak ah lungkua chung ah ti a khat i nihra renglo eidin awk ngei lo in an taap. Ngakchia 13 cu Thai cozah le ramkip nunchanhtu phu in mi tampi nih har taktak in an chanhchuah khawh than hna. Hi thil a cangmi thawngpang nih vawleicung ramkip a cul.
Ref: DVB Burmese
About The Author
