Mai Ni Iang Motor In A Pahtu Sagaing Ramthen Biaceih Bawizik Fapa An Tlai Kho Rih Lo

TCP-Thantlang| 2019 January 5| Sagaing ramthen biaceihbawi zik a fapa San Wa-nah (kum 32) nih Hakha Economic Bank riantuan pakhat a si mi Mai Ni Iang (kum 23) cu 2019 January 3 ah motor in a pah caah a nunnak a liam. Asinain, nihin ni tiang an tlai kho rih lo tiah kan theih. 

Thil sining cu 2018 December 31 zan Hakha-Gangaw lam ah Pyidawtha sang um Ni Iang a zung tinlei le San Wa-nah motor a kai cu hmaitonh in an i pah caah pe 100 tluk hlat nak ah Ni Iang cu aa hlonh caah Mai Ni Iang cu a kehlei kut le a Orhlei ke a kiah pin ah a hmai aa khawnning a fak ngaingai. Cu zan lila ah cun Ni Iang cu Mandanlay sii-inn ah an tlikpi colh nain a thluak chung i thi a luh caah 2019 January 3 zan suimilam 8 tluk Mandalay sii-inn ah a nunnak a liam hi a si.

Chin ramkulh upadi bawi Suny Thang Cung nih Sagaing ramthen upadi bawizik cu Kumthar hmang dingin Hakha ah a rak sawm i a fapa he an rat hi a si. Mai Ni Iang a pate Pu Hre Cem nih, “Palek pawl kan inn ah an ra an i pahnak hmanthlak, le thilri dangdang an rak put. Upadi ningin kan tawlrel lai. Nanmah ra in ahmuh (case) nan buaipi a hau lai lo an kan ti. January 4 ah Chin ramkulh upadi bawizik Win Myint Kyaw, Rev. Ngun Thawng Mang le khuanu/pa lei in Pu Ral Kham an ra i Lai phung ning tein a ruak cu kan in fim tawlpiak hna lai an kan ti nain kan duh lo. Chin ramkulh upadi bawizik Win Myint Kyaw nih a thih cang caah ahmuh (case ) poh-mah hi kan thlen lai a ti. Tlaih dingin nawlzong kan pek cang hna’ a ti. Motor mawng tu pa zong mah zan lila ah aa-ma-khan in an luat ter i Monywa ah an tlunter nain a tutiang an tlai rih lo” tiah a chim.

Mai Ni Iang le hawilei pahnih cu Gangaw lam (view point) pawng ah Arsa kio zuar in dawr a tuah pah mi an si. December 31 zan 9:30 tluk dawr an khar hnu inn an tin lei ah a tu bantuk in motor he an in pah cu a si.

“A hawile pahnih zong fakngai in an i khawng ve” tiah a hmutu hna Esther nih a chim. Mai Ni Iang ruak cu Januaty 5 zinglei ah Hakha an phanh pi tiah kan theih.

Ref:Zalen, Lungthing.com

Leave a Commnet

%d bloggers like this: