Malaysia ah Myanmar rianṭuantu 100 leng tlaih an tong i bawmhnak an herh
The Chinland Post | 2022 August 11 – Malaysia ram, Kuala Lumpur khua sang pakhat cu Malaysia Lah-wah-kah nih August 8 zaanṭim ah an luhhnawh hna i tlaih a tongmi phunglut lo rianṭuantu 170 leng chungah Myanmar rammi 115 an i tel tiah theih a si.
Cu chungah minung 17 cu an thlah ṭhan cang hna tiah Myanmar rianṭuantu kong he pehtlai in a cawlcangmi U Thiha Maung Maung nih RFA ah a chim.
“Tlaih a tongmi chungah ramdangmi zong an i tel. Myanmar rammi he, Nepal rammi, Indonesia, Sri Lanka, India, Bangladesh hna an i tel. A tambik cu Myanmar rammi an si. August 11 tiang kan theih ning ahcun 115 chungah 17 an luat cang. Sonny sehzung ah phunglut tein rian a ṭuanmi pawl an si. An tlaih hna lioah an kut chungah tette zeihmanh a um lo caah an tlaih chih hna”.
International Labour Organization (ILO) thanhmi cazin ning ahcun Malaysia le Thai ram ah rian a ṭuanmi Myanmar rammi 2 million leng an um.
Malaysia ram ah phunglut lo rianṭuantu pawl tangka tlawmte liamter in mah le umnak hmun kuat ṭhannak program cu June thla dongh ah a dih cang. Cucaah July 1 thok in phunglut lo rianṭuantu pawl tlaihnak program thok a si cang tiah Malaysia ramchung lei zung nih a thanh.
Tlaih a tongmi pawl hi a ziizut an ton ahcun thong kum 3 tiang thlak khawh an si tiah U Thiha Maung Maung nih a chim.
About The Author
