Malaysia ram hlei cung in Chinmi pa nih a fale a nam hna i amah zong a zuang ve
The Chinland Post | 2022 August 3 – Malaysia ram, Kuala Lumpur (MRR2) mawṭaw lamcung hlei in Chinmi U Cholei (Kum 38) nih a fale 3 kha tla lak in a nam hna i amah zong a zuang i aa that ve tiah thawng theih a si.
Hlei cung zuanak in a thimi hi Mara miphun U Cholei (kum 38), a fanu Vadetiosh (kum 8), a fapa Vabiechose (kum 6) an si i kum 3 hngakchia pate hi cu fak piin hma a tuar caah Selayang sizung ah an thlop lio a si.
Thilsinning hi August 2 zinglei sml 5:30am ah U Cholei nih a fale hruai buin hlei cung an kai tiah a hmumi nih an chim tiah Malaysia thawngzamh nih an ṭial.
A pawngkam ummi nih naih an timh hna tikah an pa nih a fale kha hlei cungin a nam colh hna i amah zong a zuang ve tiah an ṭial. U Cholei hi a caancaan ah a lung a molh tawn i thilsinning a can ni zaan sml 12:00am ah inn in hngakchia he a rak chuak cang tiah theih a si.
Sii lei thiamsang pawl nih an zoh tikah a thimi hi a paw chung hma le a kehlei hnakruh a kiah kha hmuh khawh a si tiah theih a si.
An ruak cu Kuala Lumpur sizung ah an kuat i a thihnak kong a ruang theihding in an hlai.
Cubantuk thilsining cu Article 302 ning in zohfel hnuah mipi sin thawng pek ṭhan ding in an hal.
A thimi pa le nu pakhat cu UNHCR card a ngeimi an si tiah theih a si.
About The Author
