Mizoram Inncimh Le Motor Lehnak In Zankhat Chung Ah Minung 21 An Thi
Salai Cung Cung| 2018 June 7| Mizoram ramkulh chung, June 4 zankhat chung veve ah inncimhnak le motor lehnak in minung 21 an thi. June 4 zanlei suimilam 6:30 tluk ah ruah fakpi in a surmi ruang ah Mizoram ramkulh Lunglei khua, Lunglawn certual thlang minung 14 khua an saknak inn dothnih a cimh ruang ah minung 10 an thi tiah kan theih.
Lunglawn certual thlang ah a ummi Vanlalpekhlua inn dothnih cu vawlei a tolhmi nih a cimhpi ruang ah minung 14 lakah 10 an thi, minung 4 cu a caanhmaante in an chanh manh hna. A thimi 10 cu pa 4 le nu 6 an si. A thimi lakah ngakchia 5 an i tel tiah Mizoram thanhca The Aizawl Post nih a langhter.
Cu bantuk in June 4 zan suimilam 12 tluk ah Aizawl le Saiha karlak khualtlawng motor pakhat cu Saiha khua phak lai Lunglei pengkomh ah aa let i motor aa cittu minung 11 an thi i minung 15 hliamhma an tong.
Motor aa lehnak hi Lunglei pengkomh pangzawl in kilometer pahnih tluk aa hlatnak hmun lamthlang meter 500 tluk a sannak hmun a tla. A thimi khualtlawng 11 lakah 9 cu hmakhatte ah an thi colh, pahih cu Serchhip sii-inn ah an thi.
June 4 zan ah a cangmi Lunglawm inn a cimh le Saiha khualtlawng motor aa leh hi zankhat chung veve ah an si. Zankhat chung bak ah minung 21 an thi.
Mizoram Chief Minister Pu Lalthanhawla le Pyi-htay-zi minister Pu R. Lalzirliana zong nih atu bantuk thil an tonmi cung ah an ngaihchiatnak kong le a thimi hna zong bawmhnak kan pekchanh hna lai tiah an chim.
Ref: Khonumthung
About The Author
